İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 346 Hüküm no: 253 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali b. İsmail’in vasîsi Hüseyin b. Mehmed’de bulunan terekesinin müteveffanın annesi Fâtıma bt. Hasan’a verilmesi Fi’l-asl vilâyet-i Anadolu’da Kastamonu sancağında Göle kazâsına tâbi‘ Kehnan? nâm karye ahâlîsinden olup Mahmiye-i İstanbul’da merhûm Vezîriazam Ali Paşa’nın hayatında kethudâsı olan İbrahim Ağa’nın hizmetinde iken fevt olan Ali b. İsmail vâlidesi ve hasran vârisesi olduğu lede’ş-şer‘i’l-enver zâhir ve mütehakkık olan Fâtıma bt. Hasan nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde müteveffâ-yı mezbûrun vasîyy-i muhtârı ve terekesine vâzı‘u’l-yed idüğü mütehakkık olan Hüseyin b. Mehmed mahzarında ikrâr-ı tâm ve takrîr-i kelâm edip oğlu müteveffâ-yı mezbûrun terekesini ben diyâr-ı âharda sâkine olmağla mezbûr Hüseyin bi’l-vesâye ahz u kabz etmişidi el-hâletü hâzihî ber-mûceb-i defter-i kassâm ba‘de ihrâci’l-mesârif sahhu’l-bâkī makbûzu olan nakd dört yüz yetmiş beş akçe ile hâric ez-defter müteveffâ-yı mezbûrun eşyâsından bir yemenî yastık ve sarı bir kebe ve bir beyaz ihrâm ve bir çakşır ve bir çuka dolama ve bir zıbun ve bir gömlek ve bir dülbend örtüsü ve bir sâde ve bir sagīr sîm kuşak ve üç makrama ve bir uçkur ve bir peşkir ve bir sincab kürk parçasını bana def‘ u teslîm ben dahi yedinden ahz u kabz eyledim ba‘de’l-yevm oğlum müteveffâ-yı mezbûrun terekesinden mezbûr Hüseyin yedinde ve zimmetinde bir akçe kalmayıp tereke-i müteveffâ-yı mezbûra ve târih-i kitâba gelince sâir husûsa müte‘allika âmme-i da‘vâdan mezbûr Hüseyin’in zimmetini ibrâ-yı âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: İbrahim Çelebi b. Ahmed, Mustafa b. İsmail, Mehmed Çelebi b. Hasan, Receb b. Müstecib, Murad Ağa b. Mahmud, İbrahim b. Mehmed, Receb b. Süleyman.