İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 347 Hüküm no: 254 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Hasan Ağa b. Abdullah’ın Cafer Ağa b. Mehmed’den alacaklı olduğu yolundaki iddiasını ispatlayamadığı Tüccâr tâifesinden olup mahmiye-i İstanbul’da Vâlide Sultân Hanı’nda sâkin Hasan Ağa b. Abdullah meclis-i şer‘-i şerîf-i enverde mahmiye-i mezbûrda Şehremîni kurbünde sâkin Cafer Ağa b. Mehmed mahzarında üzerine da‘vâ ve takrîr-i kelâm edip bin yüz senesi Saferü’l-hayrı gurresiyle müverrah mümzâ ve mahtûm temessükü mûcebince gāib ani’l-meclis sâbıkā Kars vâlîsi iken fevt olan İsmail Paşa’nın hayatında kapucular kethudâsı olan Hasan Ağa zimmetinde her kürçesi otuzar guruş olmak üzere on iki kürçe yedimden iştirâ ve kabz eylediği kırmızı Diyârbekir bezi bahâsından üç yüz altmış guruş hakkım olmağla meblağ-ı mezbûra mezbûr Hızır Ağa tarafından emir ve kabûlü hâvî kefâlet-i sahîha-i şer‘iyye ile kefîl olmağın kefâletine binâ’en meblağ-ı [mezbûr] üç yüz altmış guruşu mezbûr Hızır Ağa’dan taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müde‘î-i mezbûr Hasan Ağa’dan müdde‘âsını mübeyyene beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka ber-vech-i muharrer meblağ-ı mezbûr üç yüz altmış guruşa tarafeynden emir ve kabûlü hâvî kefâlet-i sahîha-i şer‘iyye ile kefîl olmayıp ve ol vechile kefâletine binâ’en meblağ-ı mezbûrun üzerine edâsı lâzım olmadığına mezbûr Hızır Ağa’ya yemîn teklîf olundukda ol dahi alâ vefki’l-mesûl yemîn billâhi’l-aliyyü’l-a‘lâ etmeğin mûcebiyle bilâ-beyyine bî-vech [80-a] mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’l-hâmis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Çukadâr Mehmed Ağa b. Abdullah, İbrahim Çelebi b. Ahmed, el-Hâc Mehmed Çelebi b. İbrahim, İbrahim Çelebi b. Ahmed, Mehmed Çelebi b. İdris, Receb b. Süleyman, Ahmed b. Ahmed.