İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 348 Hüküm no: 255 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü esnâfının işlerine haksız yere müdahale edip zarar veren Mustafa Çelebi’nin ikaz edildiği Mahmiye-i İstanbul’da vâki‘ kömürcü tâifesinin kethudâları olan İbrahim b. Ahmed ve ihtiyârlarından Mehmed Beşe b. İsmail ve Salih Beşe b. Ramazan ve Mehmed Çelebi b. Hüseyin ve Mustafa b. Mansur ve Ömer Beşe b. Mehmed ve Mustafa b. Said ve Ömer b. Mehmed ve İbrahim b. Mehmed ve İsmail b. Ahmed ve Mehmed b. Hüseyin ve Ahmed b. Abdullah ve Osman b. Hasan nâm kimesneler ile yine tâife-i mezbûrdan Hazaros v. Marat ve Misail v. Vasil ve Norsez v. Kiragos ve Sokaz v. Ohan ve Peter v. Vartan ve Norhat v. Ferhat ve Şirin v. Ferhat ve Asador v. Hazaros ve Mikail v. Tamur ve Hıristo v. Marat ve Kilyar v. Bogos ve Avanis v. Kiragos ve Hortos v. Şirvan ve Aslan v. Hıristo ve Kosta v. Kiragos ve Agop v. Yoseb ve Nikola v. Meşih ve Şirvan v. Kurt ve Bogos v. Manol ve sâirleri dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde tâife-i mezbûreden es-Seyyid Mustafa b. Ali mahzarında her biri takrîr-i kelâm ve bast-ı merâm edip mezbûr es-Seyyid Mustafa bundan akdem ben üzerinize kethudâ oldum deyü cânib-i mîrîye verilen kömürümüzün akçesini ba‘de’l-kabz ashâbına tevzî‘ ve edâ etmeyip kendi mesârifine sarfla istihlâk eylediğinden mâ‘adâ her birimizi birer tarîk ile hilâf-ı inhâ tağrîm ve tecrîm ve durûb ve şütûm edip mezbûrun ef‘âl ve akvâlinden cümlemiz müte’ezzî ve mutazarrır olmağla beynimizde ihtilâle bâdî olmağla ba‘de’l-yevm mezbûr es-Seyyid Mustafa bâ‘is-i ihtilâl olmamak içün asla umûrumuza karışmamağa râzı ve müte‘ahhid olmuşdur hâlâ suâl olunup takrîri tahrîr olunmak matlubumuzdur dediklerinde gıbbe’s-suâl mezbûr es-Seyyid Mustafa Çelebi cevâbında fi’l-hakīka kazıyye vech-i muharrer üzere olup ba‘de’l-yevm tâife-i mezbûrenin asla umûrlarına karışmamağa râzı ve müte‘ahhid oldum dedikde mâ hüve’l-vâki‘ hıfzan li’l-makāl bi’t-taleb ketb olundu. Fi’l-yevmi’t-tâsi‘ min-Şevvali’l-mükerrem sene 1017 Şuhûdü’l-hâl: Umdetü erbâbü’t-tahrîr ve’l-kalem Yusuf Efendi tezkire-i evvel, zübdetü ashâbi’t-tastîr ve’r-rakām tezkire-i sânî Hâfız Efendi, Fahrü’l-emâcid ve’l-a‘yân Mehmed Ağa ser-çavuşân, Fahrü’l-kuzât Mustafa Efendi, Halil Efendi b. Mehmed, Ali Beşe Çukadar, el-Hâc Mehmed Efendi b. Hüseyin, Receb Beşe b. Süleyman.