İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 349 Hüküm no: 256 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri ve sair kasapların sâbık Kasabbaşı Sarı Osman Ağa b. Mehmed Ağa’nın vekili İstamo v. Dimolana’ya gönderdiği parayı yerine ulaştırdıkları Mahmiye-i İstanbul’da Elvanzâde mahallesinden olup sâbıkā kasabbaşı oldukdan sonra Bolu voyvodası iken fevt olan Sarı Osman Ağa b. Mehmed’in evlâd-ı sıgārı Salih ve İbrahim ve Ömer ve Süleyman ve Mehmed ve Ali ve Hatice ve Fâtıma ve Zeyneb ve Hacer ve Emetullah’ın vasîyy-i muhtârları olan el-Hâc Mehmed Ağa b. Ahmed dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i âlîde Dergâh-ı âlî yeniçerilerinin Etmeydânı’nda kasap olan işbu ashâbü’l-vesîka Dimitri v. Tanaş ve Dimitraşko v. Yorgaki ve Dimitraki v. Yorgaki ve Apostol v. Aleksi ve Hürmüz v. Dimitri ve Hıristo v. Yorgi ve Yorgo v. Luka nâm zimmîler muvâcehelerinde bi’l-vesâye üzerlerine da‘vâ ve takrîr-i kelâm edip müteveffâ-yı mezbûr Sarı Osman Ağa hâl-i hayatında bin yüz bir senesinde kasabbaşı iken bundan akdem hâlik olan İstamo v. Dimolana zimmî mezbûrun vekîli ve işbu mezbûrûn zimmîler Meydân kasâbları olmağla Dergâh-ı âlî yeniçerilerine tevzî‘ eyledikleri lahm-ı ganemin her vakıyyesi içün birer parayı ba‘de’l-ahz Dergâh-ı âlî yeniçerilerine verilecek lahm içün yedinde koyun bulunmamağla vekîl-i mezbûr İstamo zikr-i âtî meblağı ba‘de’l-kabz koyun iştirâ etmek üzere mezbûr Osman Ağa kendi malından nakd doksan altı bin beş yüz elli akçeyi götürüp mezbûr İstamo’ya def‘ u teslîm etmek içün mezbûrûn Dimitri ve Dimitraşko ve Dimitraki ve Apostol ve Hürmüz ve Hıristo ve Yorgo’ya bi tarîkı’l-emâne def‘ u teslîm edip onlar dahi ahz u kabz eylediklerinden sonra mezbûr Osman Ağa’nın emrine binâ’en meblağ-ı mezbûru mezkûr İstamo’ya teslîm etmeyip yedlerinde kalmağla kable’l-ahz mezbûr Osman Ağa fevt olmuşdur hâlâ suâl olunup meblağ-ı mezbûru sıgār-ı mezbûrûn içün bana teslîme mezbûrûn zimmîlere tenbîh olunmak matlûbumdur dedikde gıbbe’s-suâl mezbûrûn Dimitri ve Dimitraşko ve Dimitraki ve Apostol ve Hürmüz ve Hıristo ve Yorgo cevâblarında fi’l-hakīka meblağ-ı merkūm doksan altı bin beş yüz elli akçeyi mezkûr İstamo’ya getirip teslîm etmek içün mezbûr Osman Ağa’dan ba‘de’l-kabz târih-i mezbûrdan mezbûr Osman Ağa’nın emrine binâ’en tamamen def‘ u teslîm etmişidik deyü def‘le mukābele etmeleriyle gıbbe’l-istintâk ve’l-inkâr mezbûrûn zimmîler husûs-ı mezbûrda emînler olup yemîn ile musaddak olan ümenâdan olmağın fi’l-vâki‘ meblağ-ı mezbûr doksan altı bin beş yüz elli akçeyi mezbûr Osman Ağa’nın emrine binâ’en vekîl-i mezkûr İstamo’ya tamamen def‘ u teslîm edip red ve damândan zimmetlerine nesne lâzım gelmediğine mezbûrûn Dimitri ve Dimitraşko ve Dimitraki ve Apostol ve Hürmüz ve Hıristo ve Yorgo’ya bi’t-taleb yemîn teklîf olundukda mezbûrûndan her biri alâ vefki’l-mesûl yemîn billâhillezî enzele’l-incîle an İsa aleyhisselâm etmeğin mûcebiyle müdde‘î-i mezbûr el-Hâc Mehmed Ağa mezkûrûn zimmîlere [80b] bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’t-tâsi‘ min-Şevvali’l-mükerrem li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem Yusuf Efendi tezkire-i evvel, zübdetü ashâbi’t-tastîr ve’r-rakām tezkire-i sânî hâfız Efendi, umdetü’l-eşbâh ve’l-a‘yân Odabaşı Mustafa Ağa, fahrü’l-akrân ve’l-ekfâ Mehmed Ağa ser-çavuşân, Fahrü’l-eşbâh kasabbaşı Süleyman Ağa, umdetü’l-eşbâh el-Hâc Mehmed Ağa, el-Hâc Halil Efendi b. Mehmed, Receb Efendi nâib-i recül, Mustafa Efendi nâib-i recül, ve gayruhum mine’l-huzzâr.