İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 350 Hüküm no: 257 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Mustafa’nın Himmet b. Ramazan’a olan borcunu ödediği Mahmiye-i İstanbul’da Hoca Üveys mahallesinde sâkin sâbıkā semercibaşı olan el-Hâc Hasan Çelebi b. Mustafa meclis-i şer‘-i şerîf-i enverde mûytâb tâifesinden el-Hâc Himmet b. Ramazan mahzarında üzerine da‘vâ ve takrîr-i kelâm edip mezbûr el-Hâc Himmet bundan akdem mahalle-i mezbûrda sâkin iken vefât eden mûytâbcı tâifesibaşı Mustafa Ağa b. Abdullah b. Abdurrahman zimmetinde beynlerinde ma‘lûm mûytâb metâ‘ı bahâsından bin yedi yüz altmış guruş hakkım olup mezbûr Mustafa Ağa hayatında meblağ-ı mezbûr bin yedi yüz altmış guruş içün ben senin üzerine üçümüz bir meclisde iken havâle-i sahîha-i şer‘iyye ile havâle edip her birimiz havâle-i mezbûreyi kabûl etdiğimizden sonra meblağ-ı mezbûrun yedi yüz guruşunu senin yedinle istifâ edip bâkī bin altmış guruş ber-vech-i muharrer zimmetinde hakkım vardır deyü beni ahz ve bi-gayr-ı hakkın bin altmış guruşumu benden ahz u gasb etmekle suâl olunup alıverilmesi matlûbumdur dedikde gıbbe’s-suâl mezbûr el-Hâc Himmet cevâbında bin doksan dokuz senesi şehr-i Ramazanı’nın on ikinci günü mahmiye-i mezbûrda Bâb mahkemesinde hilâfete müvellâ olan Mehmed Efendi b. İsmail huzûrunda müteveffâ-yı mezbûr Mustafa Ağa b. Abdullah b. Abdurrahman zimmetinde ber-vech-i muharrer beynimizde ma‘lûm mûytâb metâ‘ı bahâsından bin yedi yüz altmış guruş hakkım olmağla müteveffâ-yı mezbûr hayatında meblağ-ı mezbûr bin yedi yüz altmış [guruş] içün beni mezbûr el-Hâc Hasan Ağa üzerine üçümüz bir meclisde iken havâle-i sahîha-i şer‘iyye ile havâle edip ben ve mezbûr el-Hâc Hasan Ağa dahi her birimiz havâle-i mezbûru kabûl etdiğimizden meblağ-ı mezbûrun yedi yüz guruşunu ber-vech-i muharrer mezbûr el-Hâc Hasan Ağa yediyle istifâ edip bâkī bin altmış guruş ber-vech-i muharrer mezbûr Hacı Hasan Ağa’dan nâib-i mûmâ-ileyh huzûrunda taleb ve da‘vâ etdiğimde ol dahi inkâr etmekle ben dahi müdde‘âmı udûl-i Müslimînden olup mahmiye-i mezbûrede Mağnisayî [Manisavî] Çelebi mahallesinde sâkin Ahmed Efendi b. Muslu ve Kâtib Muslihiddin mahallesinde sâkin el-Hâc Ali b. Mehmed ve Mehmed Çelebi b. İsmail nâm kimesneler şehâdetleriyle mezbûr Hacı Hasan Ağa muvâcehesinde şer‘an isbât edip edâsına tenbîh ve işbu hüccet-i şer‘iyye tahrîr olunup yedime verildikden sonra sekiz gün mürûrunda meblağ-ı mezbûr bin altmış guruş mezbûr el-Hâc Hasan Ağa yedinden ahz u kabz edip meblağ-ı mezbûr bin yedi yüz guruşu ber-vech-i muharrer istifâ etmekle yine nâib-i mezbûr huzûruna varıp ber-vech-i muharrer kabzımı ikrâr edip işbu hüccet-i şer‘iyye dahi tahrîr ve mezbûr el-Hâc Hasan Ağa yedine verilmişidi deyü nâib-i mûmâ-ileyhin imzâsıyla mümzât ve hatmiyle mahtûme ve târih-i mezkûr ile müverraha ve mazmûnları takrîr-i meşrûhuna muvâfık bir kıt‘a hüccet ve bir kıt‘a sûret-i sicil ibrâz etmeğin gıbbe’l-istintâk mezbûr el-Hâc Hasan Ağa cevâbında bâlâda zikri mürûr etdiği vech üzere bi-hükmi’l-havâle meblağ-ı mezbûr bin altmış guruşu mezbûr el-Hâc Himmet’e def‘ u teslîm eylediğini ve zikrolunan iki kıt‘a hüccetlerin mazmûnlarını ikrâr ve i‘tirâf etmeğin alâ mûcib-i i‘tirâfihî mezbûr el-Hâc Hasan Ağa bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’s-sâmin min-Şevvali’l-mükerrem li-sene seb‘a ve mie ve elf. Şuhûdü’l-hâl: A‘lemü’l-ulemâi’l-izâm hâlâ müneccimbaşı fazîletlü Mehmed Efendi, Fahrü’l-müderrisîni’l-kirâm Abdurrahman Efendi, Hasan Ağa b. Mehmed, İbrahim Efendi b. Mustafa, Çerâğī imâmı Mehmed Efendi.