İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 351 Hüküm no: 258 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçerilerin Kırk Üçüncü Ağa Bölüğü’ne mahsus nukudun sâbık mütevellisi Abdullah Ağa’ya yaptığı usulsüz harcamaların tazmin ettirilmesi Husûs-ı âti’l-beyânın mahâllinde istimâ‘ı ve tahrîri iltimâs olunmağın savb-ı şer‘-i enverden Mevlânâ Mehmed Efendi b. Hüseyin me’zûnen irsâl olunup ol dahi mahmiye-i İstanbul’da eski odalarda vâki‘ Dergâh-ı âlî dâme mahfûzan bi’l-me‘âlî yeniçerilerinin kırk üçüncü ağa bölüğüne mahsûs odaya varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i kavîm eyledikde oda-i mezbûr neferâtı mühimmâtına mevkūfe nukūdun bi’l-fi‘l mütevellîsi olan râfi‘ü’l-kitâb Ahmed Odabaşı b. Abdullah nâm kimesne meclis-i ma‘kūd-ı mezbûrda medîne-i Ebâ Eyyûb el-Ensârî aleyhi’r-rahmeti’l-Bârî mahallâtından Şah Sultân mahallesinde sâkin olup nukūd-ı mevkūfe-i mezkûrenin bundan akdem mütevellîsi olan Abdullah Ağa b. İsmail nâm kimesne mahzarında bi’t-tevliye üzerine da‘vâ ve takrîr-i kelâm edip mezbûr Abdullah Ağa tevliyet-i merkūmeden azl olunup yerine ben mütevellî olmağla mezbûrun işbu meclis-i şer‘de oda-i merkūme ahâlîsi mahzarlarında bin yüz üç senesi Muharremi gurresinden târih-i kitâba gelince muhâsebesini gördüğümde [81a] mezbûr Abdullah Ağa sinîn-i mezkûrede zimem-i nâsda asl-ı mâl olan beş bin beş yüz kırk iki guruşun içinden yedi yüz doksan guruşu bi’t-tevliye ahz u kabz edip makbûzu olan meblağ-ı mezbûr yedi yüz doksan guruş oda-i mezbûr ahâlîsinin mühimmâtlarına vefâ etmemekle asl-ı maldan ba‘de’l-harc nemâsından tekmîl olunmak üzere meblağ-ı mezbûr yedi yüz doksan guruş ve asl-ı maldan dahi beş yüz yirmi iki guruş ki cem‘an bin üç yüz guruş dört senedir oda-i mezbûr ahâlîsinin mühimmâtına ihtiyârlarımız ma‘rifetiyle harc ve sarf edip ve zimem-i nâsdan bin beş yüz üç guruş dahi kabz ve meblağ-ı merkūmun sekiz yüz yirmi buçuk guruşunu kendi mesârifine sarfla ve altı yüz seksen iki buçuk guruşu dahi hilâf-ı şurût-ı vâkıf bilâ-rehin ve lâ kefîl âhara idâne ve teslîm edip ol vechile istihlâk etmekle hâlâ suâl olunup asl-ı mal-ı vakf-ı mezbûrdan kendi mesârifine sarfla istihlâk eylediği meblağ-ı mezbûr sekiz yüz yirmi iki buçuk guruş ile hilâf-ı şart-ı vâkıf bilâ-rehin velâ kefîl âhara idâne ile istihlâk eylediği meblağ-ı mezbûr altı yüz seksen iki buçuk guruş ki cem‘an bin beş yüz üç guruşu bana edâya tenbîh olunmak matlûbumdur dedikde gıbbe’s-suâl mezbûr Abdullah Ağa cevâbında fi’l-hakīka kazıyye bâlâda tafsîli mürûr etdiği vech üzere olup asl-ı mal-ı vakf-ı mezbûrun zimeminden bin beş yüz üç guruş ahz u kabz ve meblağ-ı mezbûrun sekiz yüz yirmi buçuk guruşunu kendi mesârifine sarfla ve altı yüz seksen iki buçuk guruşunu dahi hilâf-ı şart-ı vâkıf bilâ-rehin ve lâ kefîl âhara idâne ile istihlâkini mezbûr Abdullah Ağa bi tav‘ıhî ikrâr ve i‘tirâf etmeğin alâ mûcebi i‘tirafihî meblağ-ı mezbûr bin beş yüz üç guruşu vakf-ı mezbûr içün mütevellî-i mezbûr Ahmed Odabaşı’ya edâ ve teslîme merkūm Abdullah Ağa’ya ba‘de’t-tenbîh vâki‘ hâli mevlânâ-yı merkūm mahâllinde ketb ve tahrîr ba‘dehû ma‘an ba‘s olunan muhâsebe kâtiblerinden Hammâmîzâde Mehmed Çelebi ve Ahmed Çelebi b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâlis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Hasan Odabaşı b. Receb, Ali Çelebi b. Ali, İbrahim Beşe b. Yakub, Osman Ağa b. Abdullah, İvaz Ağa b. Abdullah, diğer Hasan Odabaşı b. Osman, Mehmed Çelebi b. Osman, Ali Odabaşı [b.] Âşûr, Mustafa Beşe b. Hasan Çavuş Aşçı, Mustafa Beşe b. Abdullah, İbrahim Beşe b. Mustafa Bosnevî, Receb Beşe b. Mehmed, Hüseyin Beşe b. Mehmed.