İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 352 Hüküm no: 259 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un kocası Mehmed Efendi b. Mehmed’den anlaşarak boşandığı Mahmiye-i İstanbul’da Suhte Sinan mahallesinde sâkine olup zâtı babası Hüseyin Çelebi b. Mustafa ve İbrahim Çavuş b. Süleyman ta‘rîfleriyle mu‘arrefe olan Ayşe nâm hatun mahfel-i kazâda zevc-i sâbıkı işbu râfi‘ü’l-kitâb Mehmed Efendi b. Mehmed mahzarında ikrâr-ı tâm ve takrîr-i kelâm edip mezbûr Mehmed Efendi bundan akdem zevciyet beynimizde kā’im iken benim her biri beşer guruş kıymetli yedi bohça içinde esbâb-ı ma‘lûme ve on dört makramamı bi gayr-ı hakkın ahz u kabz ve istihlâk etmekle kıymetleri olan otuz beş guruşu mezbûrdan taleb ve da‘vâ eylediğimde ol dahi edâdan imtinâ etmekle beynimizde nizâ‘-ı küllî vukû‘undan sonra muslihûn tavassut edip mûmâ-ileyh Mehmed Efendi da‘vâ-yı mezkûremden benimle on guruş üzerine sulh oldukda ben dahi sulh-ı merkūmu kabûl ve bedel-i sulh olan meblağ-ı merkūm on guruşu mezbûr Mehmed Efendi yedinden tamamen ahz u kabz etdiğimden sonra husûs-ı merkūma ve târih-i kitâba gelince beynimizde cereyân eden ahz u i‘tâya müte‘allika cemî‘-i da‘vâ ve mütâlebâtdan ben mezbûr Mehmed Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt edip mezbûr Mehmed Efendi dahi beynimizde ma‘lûm bir donluk çukaya ve târih-i mezkûra gelince beynimizde cârî ahz u i‘tâya müte‘allika âmme-i de‘âvîden benim zimmetimi ibrâ ve ıskāt eyledi ve mehr-i mü’eccelim olan kırk guruşu dahi mukaddemâ ahz u kabz etmekle ba‘de’l-yevm birbirimiz ile da‘vâ ve nizâ‘ımız kalmadı dedikde gıbbe’t-tasdîkı’l-mer‘î mâ vaka‘a bi’t-taleb ketb olundu. Fi’l-yevmi’l-hâmis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: el-Hâc Osman Halîfe b. Ahmed, Hüseyin b. Mustafa, İbrahim Çavuş b. Süleyman, Ahmed Çelebi b. Mustafa.