İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 353 Hüküm no: 260 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fâtıma bt. Hasan’dan varislerine intikal eden evin Fethiye Hatun’a satıldığı Mahmiye-i İstanbul’da Akşemseddin mahallesinde sâkine iken bundan akdem vefât eden Fâtıma bt. Hasan nâm hatunun verâseti zevci Hamza b. Ali ile vâlidesi Hamide bt. Abdullah li-ebeveyn kız karındaşı Emetullah nâm hatunlara münhasıra olduğu şer‘an zâhir ve müte‘ayyen oldukdan sonra mezbûr Hamza asâleten ve mezbûretân Hamide ve Emetullah nâm hatunlar taraflarından husûs-ı âti’l-beyâna vekîl olduğu mezbûretânın zâtlarını ma‘rifet-i şer‘iyye ile ârifân el-Hâc Hüseyin b. Ahmed ve Mehmed b. İbrahim nâm kimesneler şehâdetleriyle şer‘an sâbit olmağla vekâleten meclis-i şer‘-i şerîf-i enverde Fethi bt. Abdullah nâm hatun tarafından husûs-ı âti’l-beyânı tasdîka vekîl-i şer‘îsi olan Mustafa Ağa b. Hüseyin mahzarında bi’l-asâle ve bi’l-vekâle ikrâr ve takrîr-i kelâm edip [81b] mûrisimiz müteveffât-ı mezbûrenin ile’l-vefât silk-i mülkünde münselike olup ba‘de vefâtihâ bize isâbet ve intikāl eden mahalle-i mezbûrede vâki‘ etrâf-ı erba‘ası mahalle-i mezbûr imâmına meşrûta menzil ve Ayşe Hatun menzili ve tarîk-i âm ile mahdûd fevkānî iki bâb oda ve tahtânî bir bâb oda ve müşterek bi’r-i mâ ve muhavvâta ve kenîfi müştemil menzilimi bi cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile bi safkatin vâhidetin mezbûre Fethi Hatun’a iki yüz kırk guruşa bey‘ ve temlîk ve teslîm ol dahi vech-i muharrer iştirâ ve temellük ve tesellüm ve kabûl etdiğinden sonra semeni olan meblağ-ı mezbûr iki yüz kırk guruşu yedinden bi’t-tamam ahz u kabz edip ba‘de’l-yevm menzil-i mezbûrda kat‘â alâkamız kalmayıp mezbûre Fethi Hatun’un mülk-i müşterâsı olmuştur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Süleyman Beşe b. Osman, Süleyman Çelebi b. Hüseyin, Mustafa Ağa b. Hüseyin, Hasan b. Hasan, İbrahim b. Ahmed, ve gayruhum mine’l-huzzâr.