İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 354 Hüküm no: 261 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Hüseyin’in Sefer v. Emirağna’ya olan borcunu ödemesi Mahmiye-i İstanbul’da Hoca Hanı’nda sâkin işbu râfiü’l-vesîka Sefer v. İmrağa nâm zimmî dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde bin doksan beş senesinde medîne-i Erzurum’da gümrük nâzırı olup hâlâ mahmiye-i mezbûrede Yakup Ağa mahallesinde sâkin Ali Ağa b. Hüseyin nâm kimesne mahzarında üzerine da‘vâ [ve takrîr-i] kelâm [edip] mezbûr Ali Ağa târih-i mezbûrda medîne-i mezbûrede gümrük nâzırı iken diyâr-ı Acem’de ticâret üzere olan Aydın nâm zimmî zimmetinde cihet-i deyn-i şer‘îden bin guruş hakkım vardır meblağ-ı mezbûru sen bana ver ba‘dehû mezbûr Aydın’dan istifâ eyle deyü beni ahz u habs ve bi gayr-ı hakkın cebren bin guruşumu ahz u kabz ve kendi mesârifine sarfla istihlâk eylediğinden sonra meblağ-ı mezbûru mezkûr Ali Ağa ve mezkûr Aydın bana vermeyip el-ân merkūm Ali Ağa zimmetinde bâkī kalmağın hâlâ suâl olunup meblağ-ı mezbûru bana red ve teslîme mezbûr Ali Ağa’ya tenbîh olunmak matlûbumdur dedikde gıbbe’s-suâl mezbûr Ali Ağa cevâbında fi’l-hakīka meblağ-ı mezbûr bin guruşu müdde‘î-i merkūm Sefer’den vech-i meşrûh üzere ahz u kabz ve kendi mesârifine sarfla istihlâk eylediğimden sonra altı ay mürûrunda medyûn-ı mezbûr Aydın diyâr-ı Acem’den medîne-i mezkûreye geldikde benim ber-vech-i muharrer mezkûr Aydın zimmetinde bin guruş hakkım olmağla üçümüz bir meclisde iken meblağ-ı mezbûr bin guruş ile müdde‘î-i mezbûr Sefer’i mezkûr Aydın üzerine havâle-i sahîha-i şer‘iyye ile havâle ve her birimiz dahi havâle-i mezbûru kabûl edip hatta müdde‘î-i merkūm meblağ-ı mezbûr bin guruşun altı yüz guruşunu mezkûr Aydın yedinden min-ciheti’l-havâleti’l-mezkûr ahz u kabz eylediğini alâ ruûsi’l-işhâd ikrâr u i‘tirâf ve işhâd dahi edip ol vechile meblağ-ı mezbûr bin guruş mutâlebesinden zimmetim berî olmuştur deyü da‘vâyı def‘ edicek gıbbe’l-istintâk ve’l-inkâr mezbûr Ali Ağa’dan def‘-i mezbûruna beyyine taleb olundukda ityân-ı beyyine içün kirâren ve mirâren istimhâl etmekle mehl-i şer‘î birle bi’d-defa‘ât imhâl olundukda ityân-ı beyyineden bi’l-külliye izhâr-ı acz edip tahlîfe dahi tâlib olmamağın mûcebiyle meblağ-ı mezbûr bin guruşu müdde‘î-i mezbûr Sefer’e edâ ve îfâya mezbûr Ali Ağa’ya tenbîh olunup mâ hüve’l-vâki‘ bi’t-taleb ketb ve tahrîr olundu. Fi’l-yevmi’r-râbi‘ aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, umdetü’l-eşbâh ve’l-a‘yân Mehmed Ağa ser-çavuşân, fahrü’l-akrân ve’l-ekfâ Mustafa Ağa odabaşı.