İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 355 Hüküm no: 262 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Dimo v. Yani v. Dedebor’un terekesine vâzı‘u’l-yed olan Mustafa’nın tasarrufundaki paranın varislerine devredilmesi Vilâyet-i Anadolu’da Yalakâbad kazâsına tâbi‘ Engürü nâm karye sükkânından bundan akdem hâlik olan Dimo v. Yani v. Dedebor nâm zimmînin ber-vech-i âtî vârisesi olduğunu iddi‘â eden Angelina bt. Todori nâm nasrâniye dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde hâlik olan, hîn-i helâkinde kazâ-i mezbûrda emîn-i beytü’l-mâl olmağla terekesinden bi’l-emâne vâzı‘u’l-yed olan el-Hâc Mustafa b. Abdullah mahzarında üzerine da‘vâ ve takrîr-i kelâm edip benim babam mezbûr Todori hâlik-i mezbûrun babası mezkûr Yani ile li-ebeveyn karındaşlar olup babaları Dedebor ve anaları adı Bilor ve ceddeleri adı Kosta olup ben hâlik-i mezbûrun li-ebeveyn ammi kızı ve vârisi olmağın hatta hâlik-i mezbûr Dimo ber-vech-i muharrer kendinin ammi kızı ve vârisesi olduğumu hâl-i hayatında alâ ruûsi’l-işhâd ikrâr ve i‘tirâf ve işhâd ve beni tasdîk edip mezbûr Dimo musırrân hâlik olmağla verâseti zevce-i menkûha-i mezkûresi işbu hazır bi’l-meclis Margarite bt. Temli nâm nasrâniye ile bana münhasıra iken emîn-i mezbûr el-Hâc Mustafa hâlik-i mezbûrun terekesinden zevcesi merkūme Margarite’nin rub‘ hissesinden mâ‘adâ selâse-i erba‘ olmak üzere para üç akçe hesâbınca dört bin akçesine bi’l-emâne vâzı‘u’l-yed olmağın hâlâ suâl olunup meblağ-ı mezbûr dört bin akçemi bana edâya mezbûr el-Hâc Mustafa’ya tenbîh olunmak matlûbumdur dedikde gıbbe’s-suâl mezbûr el-Hâc Mustafa cevâbında fi’l-hakīka [82a] tereke-i hâlik-i mezbûrun selâse-i erba‘ olmak üzere para üç akçe hesâbınca meblağ-ı mezbûr dört bin akçeye ber-vech-i muharrer bi’l-emâne vazı‘-ı yedini ikrâr lâkin müdde‘iye-i mezbûreden müdde‘âsına beyyine taleb olundukda udûl-i Müslimînden ve mukaddemâ pazarcı tâifesinden olmağla ekser eyyâmda karye-i mezbûrede ticâret üzere olup hâlâ Dergâh-ı âlî yeniçerilerinin sekizinci sekbânlarına mahsûs oda ahâlîsinden Kollukçu İbrahim Beşe b. Musa nâm kimesne ile karye-i mezbûre sükkânından Aksendi v. Yani nâm zimmî li-ecli’ş-şehâde meclis-i ma‘kūd-ı mezbûra hazırân olup isre’l-istişhâd fi’l-vâki‘ hâlik-i mezbûr Dimo v. Yani v. Dedebor hâl-i hayatında benim babam mezbûr müdde‘iye-i mezbûrenin babası mezkûr Todori ile li-ebeveyn karındaşlar olup babaları adı Dedebor ve anaları adı Bilor ve cedleri adı Kosta olup müdde‘iye-i mezbûre Angelina li-ebeveyn ammim kızı ve vârisemdir deyü bizim huzûrumuzda kirâren ve mirâren ikrâr ve i‘tirâf ve bizi işhâd edip mezbûre Angelina dahi tasdîk eyledikden sonra mezbûr Dimo musırrân hâlik olmuşidi hâlâ hâlik-i mezbûrun terekesinden selâse-i erbâ‘ını emîn-i mezbûrdan ve sâir vâzı‘u’l-yed olanlardan müdde‘iye-i mezbûre içün hakk-ı taleb ve ahzı vardır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ hüve’l-vâki‘ bi’t-taleb ketb olundu. Fi’l-yevmi’s-sâdis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem Tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, umdetü’l-eşbâh ve’l-a‘yân Mehmed Ağa serçavûşân, fahrü’l-akrân ve’l-eşbâh odabaşı Mustafa Ağa ve gayruhum mine’l-huzzâr.