İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 356 Hüküm no: 263 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tabip Yorgaki v. Mihal’in boşandığı karısı Cevherya aleyhine açtığı davadan vazgeçtiği Mahmiye-i İstanbul’da Fenerkapısı kurbünde sâkin Tabib Yorgaki v. Mihal nâm zimmî meclis-i şer‘-i şerîfde zevce-i mutallakası olup zâtını ma‘rifet-i şer‘iyye ile ârifân Ali Çelebi b. Bali ve Nikola v. Panayot ta‘rîfleriyle mu‘arrefe olan Çoheriya? zevce-i menkûham olmağla hâlâ mezbûreyi tatlîk edip mezbûrenin yedinde isti‘mal üzere olan bir sîm gülâbdân ma‘a buhûrdân ve bir sîm kandil ve beş çatal sîm benim mülkümdür deyü da‘vâ sadedinde olmuşidim el-hâletü hâzihî zikrolunan evânî-i sîm ve hukūk-ı zevciyete ve târih-i kitâba gelince beynimizde cereyân eden sâir hukūka müte‘allika âmme-i da‘vâdan ben mezbûr Cevherya’nın zimmetini ibrâ-i âmm-ı kātı‘u’n-nizâ‘la ibrâ ve ıskāt edip ol dahi hukūk-ı zevciyete ve târih-i kitâba gelince beynimizde cereyân eden sâir hukūka müte‘allika âmme-i da‘vâdan benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledi min-ba‘d [bir] birimiz ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb ve tahrîr olundu. Fi’l-yevmi’s-sâbi‘ aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Ali Çelebi b. Bali, İbrahim Çelebi b. Ahmed, Ali Çelebi b. Şaban, Mahmud Çelebi b. Mehmed, Papa Labinno, Derzi Dimitraki v. ( ), Foti v. ( ).