İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 357 Hüküm no: 264 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi’nin cinlere karışıp mecnun olan Mahmud b. Veli b. Ali’den zorla aldığı parayı taksitle ödemeyi kabul ettiği Medîne-i Bağdad-ı bihişt-âbâd’da Sabuncular mahallesinde sâkin olup cünûn-ı mutbık ile hâlâ mecnûn olan el-Hâc Mahmud b. Veli b. Ali nâm kimesnenin tesviye-i umûruna kıbel-i şer‘den mansûb vasîsi olan Bağdad Rûznâmçecisi es-Seyyid Ebûbekir Efendi b. Bali tarafından husûs-ı âti’l-beyâna vekîl-i müsecceli olan el-Hâc Mehmed Çelebi b. Receb meclis-i şer‘-i şerîf-i enverde es-Seyyid Ömer Çelebi b. es-Seyyid Mustafa mahzarında bi’l-vekâle ikrâr-ı tâm ve takrîr-i kelâm edip mezbûr es-Seyyid Ömer Çelebi <> gāib ani’l-meclis karındaşı Osman Ağa nâm kimesne Bağdad’da yeniçeri ağası iken medîne-i mezbûrda olmağla benim Ebûbekir Ağa nâm kimesne zimmetinde olan hakkıma sen kefîl oldun deyü müdde‘âsını isbât etmeksizin müvekkilim mûmâ-ileyh es-Seyyid Ebûbekir Efendi’nin vasîsi olduğu mezbûr el-Hâc Mahmud’u medîne-i mezbûrda yeniçeri ağası matbahına cebren habs ve kerh etdirip zevcesi Ayşe Hatun yediyle üç bin yedi yüz elli guruşunu bi gayr-ı hakkın ahz ve kendi mesârifine sarfla istihlâk eylediğinden sonra kable’l-ahz mezbûr el-Hâc Mahmud’a cünûn târî olup meblağ-ı mezbûr es-Seyyid Ömer Çelebi zimmetinde kalmağın işbu yedimde olan hüccet-i şer‘iyye mûcebince bundan akdem müvekkilim mezbûr meblağ-ı mezbûr üç bin yedi yüz elli guruşu mezbûr es-Seyyid Ömer Çelebi’den taleb ve da‘vâ ve edâsına hükm-i şer‘-i şerîf lâhık olmuşidi el-hâletü hâzihî meblağ-ı mezbûru es-Seyyid Ömer Çelebi ucâleten edâya iktidârı olmamağla tecîline tâlib [82b] olduğundan ben dahi bi’l-vekâle üç yüz altmış gün tamamında müvekkilem mezbûra yüz elli guruş verip târih-i kitâbdan üç yüz ay tamamına değin meblağ-ı mezbûr üç bin yedi yüz elli guruşu bi’t-tamam edâ etmek üzere taksît etdiğimden ol dahi ber-vech-i muharrer taksît-i mezbûru kabûl ve meblağ-ı mezbûr üç bin yedi yüz elli guruşu vech-i meşrûh üzere edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: es-Seyyid Ebûbekir Çavuş b. es-Seyyid Mehmed, es-Seyyid Mehmed Çelebi b. es-Seyyid Abdülkerim, es-Seyyid İbrahim Çelebi b. Hüseyin, Yusuf Çelebi b. Abdullah, el-Hâc Ömer Çelebi b. Mehmed, Hamza Çelebi b. Mehmed, İbrahim Çelebi b. Ahmed, Receb Çelebi b. Süleyman, İbrahim Çelebi b. Ahmed, ve gayruhum mine’l-huzzâr.