İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 358 Hüküm no: 265 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük iken babası ölen Mehmed’in annesinin izniyle parasını işleten Ömer b. Mehmed ile alacak verecek konusunda anlaştıkları Vilayet-i Anadolu’da Edincik kasabasına tâbi‘ Keçili nâm karye sükkânından el-Hâc Ömer b. Mehmed meclis-i şer‘-i şerîf-i enverde kasaba-i mezbûrede Karahisar mahallesinde sâkin iken bundan akdem tarîk-i hâcc-ı şerîfde fevt olan el-Hâc Ahmed b. Mehmed’in sulbî kebîr oğlu el-Hâc Mehmed mahzarında ikrâr-ı tâm ve takrîr-i kelâm edip mezbûr el-Hâc Mehmed babasının hîn-i vefâtında sagīr olmağla mezbûrun tesviye-i umûruna kıbel-i şer‘den mansûb vasîsi olan gāibe ani’l-meclis vâlidesi Zeyneb bt. el-Hâc Mehmed nâm hatun yedinde sagīr-i mezbûr malından almak üzere beş yüz guruş ahz u kabz etdiğimden sonra mezbûre Zeyneb’in izniyle meblağ-ı mezbûru on iki sene irbâh ve istirbâh etdiğimden sonra beş yüz guruş sinîn-i mezbûreden ribh hâsıl olup cem‘an asl-ı mâl ve nemâsı bin guruşa bâliğ ve meblağ-ı mezbûr bin guruşu kendi mesârıfıma sarfla istihlâk etmekle mezbûr el-Hâc Mehmed işbu yedinde olan hüccet mûcebince meblağ-ı mezbûru bundan akdem benden da‘vâ ve hükm-i hâkim lâhık olup zimmetimde meblağ-ı mezbûr şer‘an edâsı lâzım olmağın mezbûr el-Hâc Mehmed meblağ-ı mezbûrun iki yüz otuz guruş mukābelesinde yedinde mülk ve hakkın olan zeytun bahçeni ve çiftlik ta‘bîr olunur menzilini bana bey‘ eyledin ancak meblağ-ı mezbûr bin guruşdan senin zimmetinde yedi yüz yetmiş guruş hakkım vardır deyü tekrar da‘vâ ve zikrolunan bahçe ve menzili bi gayr-ı hakkın zabtetmekle ben dahi işbu yedimde olan hüccet mûcebince zikrolunan bağçe ve menzili mezbûr el-Hâc Mehmed’den taleb ve da‘vâ ve kasr-ı yedine kıbel-i şer‘den tenbîh olunmağla beynimizde münâza‘ât-ı kesîre vâkı‘a olmuşidi el-hâletü hâzihî yedimde mülk ve hakkım olup Dutlu nâm karyede vâki‘ bir tarafı kendi mülküm ve bir tarafı Rusoğlu mülkü ve bir tarafı Tekerlekoğlu mülkü ve bir tarafı tarîk-i âm ile mahdûd zeytun bağçemi cemî‘-i tevâbi‘ ve levâhıkıyla mezbûr el-Hâc Mehmed’e tarafeynden îcâb ve kabûlü hâvî bey‘-i kat‘î ile üç yüz guruşa bey‘ ve temlîk ol dahi ber-vech-i muharrer iştirâ ve temellük ve mahâllinde kabza teslît etdiğimden sonra semeni olan meblağ-ı mezbûr üç yüz guruşu mezbûr el-Hâc Mehmed’e zimmetimde deynim olan meblağ-ı mezbûr bin guruşumun ol mikdârına takās ol dahi mukāssa ve kabûl etdiğinden sonra zikrolunan bahçe mezbûrun mülk-i müşterâsı olup ben husûs-ı mezkûra ve târih-i kitâba gelince sâir husûsa müte‘allika âmme-i da‘vâdan mezbûr el-Hâc Mehmed’in zimmetini ibrâ-i âmm-ı kātı‘u’n-nizâ‘la ibrâ ve ıskāt edip ol dahi müdde‘âsı olan meblağ-ı bâkī mezbûr yedi yüz guruşa ve târih-i kitâba gelince sâir husûsa müte‘allika âmme-i da‘vâdan benim ve vâlidesi mezbûrenin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: Abdurrahman Efendi b. Abdullah, el-Hâc Eyüb b. el-Hâc Mehmed, Mehmed Çelebi b. Osman, el-Hâc Mustafa Ağa b. Derviş, Müezzin Ahmed Çelebi b. Hüseyin, Muslu Çelebi b. Yusuf, Muslu Ağa b. Davud, Mehmed b. Ali, Mustafa Efendi b. ( ), el-Hâc Yusuf Efendi b. Mustafa, İbrahim Çelebi b. Ahmed, Mehmed Çelebi b. İdris ve gayruhum.