İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 360 Hüküm no: 267 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’ın tasarrufunda bulunan vakıf menzile mülk olmak üzere ilave ettiği kısmın kıymetinin belirlenmesi Husûs-ı âti’l-beyânın mahâllinde keşf ve tahrîri içün sâdır olan fermân-ı âlîye imtisâlen savb-ı şer‘-i âlîden irsâl olunan keşf nâibimiz fahrü’l-müderrisîn Mevlânâ Abdullah Efendi b. Ali hâssa mi‘mâr larından Üstâd Ali Halîfe b. Mustafa ve diğer Ali Halîfe b. Abdullah ile mahmiye-i İstanbul’da Aksaray kurbünde Murad Paşa-yı atîk mahallesinde vâki‘ merhûm-ı mezbûr Murad Paşa Vakfı’ndan icâreteyn-i ma‘lûmeteyn ile bâ‘isetü hâze’l-kitâb Safiye bt. Abdullah nâm hatunun taht-ı tasarrufunda olan zikr-i âtî menzile varıp ebniye ve sukūf ahvâline ıttılâ‘-ı tâmmı olup zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i mübîn eyledikde mezbûre Safiye Hatun meclis-i ma‘kūd-ı mezkûrda bi’l-fi‘l vakf-ı mezbûr mütevellîsi olan fahrü’l-akrân Yusuf Ağa b. Abdurrahman’ın vekîl-i müsecceli ve vakf-ı mezbûr nâzırı olan Ahmed Ağa b. el-Hâc Mustafa hazır olduğu hâlde takrîr-i kelâm ve bast-ı merâm edip ber-vech-i meşrûh mutasarrıf olduğum bir tarafdan yine vakf-ı mezbûrdan İmâm Mehmed Efendi tasarrufunda olan vakıf menzil ve bir tarafdan nâzır Fâtıma Hatun tasarrufunda olan menzil ve bir tarafdan Dolâbî el-Hâc Ahmed tasarrufunda olan arsa ve bir tarafdan tarîk-i âm ile mahdûd tûlen on bir buçuk ve arzan dokuz ki bi-hesâbı terbî‘î yüz dört buçuk zirâ‘ arsa-i hâliye üzerine nefsim içün mülküm olmak üzere mütevellî-i mezbûr Yusuf Ağa izniyle malımla müceddeden binâ ve ihdâs eylediğim işbu sakf-ı vâhid tahtânî bir bâb oda ve bir sofa ve bir kenîf keşf ve misâha ve mertebe-i tahammülü kıymeti tahmîn-i sahîh ile tahmîn ve takvîm olunmak matlûbumdur dedikde gıbbe’t-tasdîkı’l-mer‘î mi‘mârân-ı mezbûrân vekîl-i mezbûr muvâcehesinde müştemilât-ı merkūmenin ebniye-i mezkûresini misâha ve tahmîn eylediklerinde tûlen ve arzen bi-hesâbı terbî‘î seksen zirâ‘-ı cedîd sakf zirâ‘ı otuzar akçeden iki bin dört yüz akçe ve bi-hesâbı mezbûr kırk iki zirâ‘ yassı şişeli çam tahtasından tavan zirâ‘ı yirmişer akçeden sekiz yüz kırk akçe ve iki aded sandık dolab her biri seksener akçeden yüz altmış akçe ve bir musandıra ber-vech-i tahmîn beş yüz akçe ve iki aded çıkrıkçı işi pencerenin her biri yüzer akçeden iki yüz akçe ve çam tahtasından bir aded kapı ma‘a çerçeve ber-vech-i tahmîn yüz ve bir aded ocak ber-vech-i tahmîn iki yüz akçe ve bi-hesâbı mezbûr kırk zirâ‘ ağa tahtasından döşemenin zirâ‘ı yirmişer akçeden sekiz yüz akçe ve bi-hesâbı mezbûr otuz altı zirâ‘ tahta perdenin zirâ‘ı on sekizer akçeden altı yüz kırk sekiz akçe ve bi-hesâbı mezbûr yetmiş iki zirâ‘ taş [duvarın] zirâ‘ı on sekizer akçeden bin iki yüz doksan altı akçe ve bi-hesâbı mezbûr kırk dört zirâ‘ iki tarafı dolma duvarın zirâ‘ı yirmişer akçeden sekiz yüz seksen akçe ve iki aded sagīr cam ber-vech-i tahmîn seksen akçe ve bir aded mükemmel sokak kapısı ma‘a kilid ber-vech-i tahmîn beş yüz akçe ve çam tahtasından kapı ağızlığı ber-vech-i tahmîn üç yüz akçe ve bi-hesâbı mezbûr altmış zirâ‘ sıvanın on ikişer akçeden yedi yüz yirmi akçe ve bir aded kenîf ber-vech-i tahmîn dört yüz akçe ki min-haysü’l-mecmû‘ ebniye-i meşrûhayı on bin yirmi dört akçeye tahmîn ve takvîm ve muslimûn-ı mezkûrûn bu kavil üzere icmâ‘ ve ittifâk ve ihbâr etdiklerini mevlânâ-yı mezbûr mahâllinde ketb ve tahrîr ve cânib-i şer‘den ma‘an irsâl olunan Mehmed Çelebi b. İbrahim ile meclis-i şer‘a gelip alâ vukū‘ıhî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Mehmed Efendi b. Mehmed el-imâm, Ahmed Efendi b. Mehmed, Mehmed Çelebi b. Yâsin el-Kayyum, İbrahim Çelebi b. Mehmed, Mustafa Çelebi b. Abdullah el-kayyum, Ahmed Çelebi b. Ali, Abdullah b. Mehmed.