İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 362 Hüküm no: 268 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Beşe b. Mehmed’in Rus asıllı kölesi Dilaver’i bedeli karşılığında kitâbet usulü ile Yusuf b. Abdullah’a sattığı Mahmiye-i İstanbul’da Üskübî mahallesinde sâkin Ömer Beşe b. Mehmed meclis-i şer‘-i şerîf-i enverde Yusuf b. Abdullah mahzarında ikrâr-ı tâm ve takrîr-i kelâm edip bundan akdem abd-i memlûküm olan evsâfı beynimizde ma‘lûm Rusiyyü’l-asl Dilaver b. Abdullah’ı üç yüz guruşa kitâbete kat‘ eylediğimde ol dahi kitâbet-i merkūmeyi ba‘de’l-kabûl bedel-i kitâbete kefâlet-i sahîha olmak zu‘mıyla mezbûr Yusuf meblağ-ı mezbûr üç yüz guruşa kefîl olduğundan sonra mezbûr Dilaver ve meblağ-ı mezbûrun yüz yirmi guruşunu mezbûr Yusuf’dan ahz edip makbûzu olan yüz yirmi guruşu bana teslîm etdiğinden sonra bedel-i kitâbete şer‘an kefâlet-i sahîha olmamağla mezbûr Yusuf beni ahz edip mahmiye-i mezbûrede Ahî Çelebi mahkemesinde hilâfete müvellâ olan Hasan Efendi huzûruna varıp mezbûr Dilaver’i bana meclis-i şer‘de teslîm etdiğinden sonra ben dahi bedel-i kitâbetin [84a] ba‘zısını istifâ ve mezbûr Dilaver dahi bâkī kalan yüz seksen guruş bedel-i kitâbeti bana teslîmden aczi yoğiken mezbûr Dilaver’i esir pazarına mahkeme-i mezbûrdan alıp bey‘a götürmek murâd etdiğimde mezbûr Yusuf tâlib olmağla yüz yetmiş guruşa mezbûr Dilaver’i benden iştirâ etmekle bey‘-i mezbûr sahîh zu‘mıyla bundan akdem meblağ-ı mezbûr yüz yetmiş guruş bana deyni içün mezbûr Yusuf’u sicn-i Sultânîde habs etdirmişidim el-hâletü hâzihî ben müdde‘âm olan mezbûr yüz yetmiş guruşa müte‘allika âmme-i da‘vâdan mezbûr Yusuf’un zimmetini ibrâ-i âmm-ı kātı‘u’n-nizâ‘la ibrâ ve ıskāt edip ol dahi bana mezbûr Dilaver yediyle makbûzu olan yüz yirmi guruşa müte‘allika âmme-i da‘vâdan benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Şevvali’l-mükerrem li-sene seb‘a ve mie ve elf. Şuhûdü’l-hâl: Ahmed b. Abdurrahman, İsmail b. Mehmed, Mehmed Çelebi b. İbrahim, İsmail b. Mustafa, Ali Bey b. Abdullah, Osman b. Abdullah, İbrahim Çelebi b. Ahmed, Ahmed b. Ahmed.