İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 364 Hüküm no: 270 Orijinal metin no: [84b] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Çelebi b. Sefer Ağa’nın varisleri arasındaki miras davasının halli Mahmiye-i İstanbul’da Kaliçeciler köşkü kurbünde merhûm Molla Ali el-Fenârî mahallesinde iken bundan akdem vefât eden Mehmed Çelebi b. el-Hâc Sefer Ağa b. Ali nâm sagīrin verâseti vâlidesi La‘lgûn Hatun bt. Abdullah ile li-ebeveyn kız karındaşı Ayşe’ye ve li-ebeveyn ammizâdesi Mehmed b. Mustafa nâm kimesneye münhasır olup ba‘dehû mezbûre Ayşe dahi fevt olup verâseti vâlidesi mezbûre La‘lgûn Hatun ile ammizâdesi mezbûr Mehmed b. Mustafa’ya münhasır olduğu şer‘an zâhir ve müte‘ayyen oldukdan sonra mezbûre La‘lgûn ba‘de’t-ta‘rîfi’ş-şer‘î meclis-i şer‘-i şerîfde sagīrân-ı mezbûrânın hayatlarında vasîleri olmağla terekelerine vâzı‘u’l-yed olan el-Hâc Mahmud b. Mehmed mahzarında üzerine da‘vâ ve takrîr-i kelâm edip oğlum mezbûr Mehmed Çelebi ile kızım mezbûre Ayşe fevt olduklarında terekelerinden mezbûr el-Hâc Mahmud’un yedinde olan mâldan iki kıt‘a defter-i kassâm nâtık olduğu üzere para üç akçe hesâbınca cem‘an üç yük otuz dört bin dokuz yüz yirmi altı akçe ve hâric-i ez-defter yüz kırk beş bin yetmiş dört akçe ki min-haysü’l-mecmû‘ bi-hesâbı esedî sekiz kese olmak üzere dört bin guruşu ırsen bana isâbet etmiş iken mezbûr el-Hâc Mahmud tereke-i müteveffiyân-ı mezbûrândan ve defter-i mezkûrlarda tahrîr olunan meblağ-ı mezbûrun iki yük kırk bin akçe hesâbı olmak üzere celî ve gayr-ı celî eşyâ-i ma‘lûmeteyi ve nükūdu bana def‘ ü teslîm ben dahi ahz u kabz edip ve mezbûrânın techîz ve tekfînleri içün defter-i kassâmda tahrîr olunan on iki bin akçeden mâ‘adâ on iki bin yedi yüz yirmi akçe dahi hîn-i fevtlerinde mesârif-i sâireye sarf içün yedinden ahz u kabz edip ve mezbûr el-Hâc Mahmud hisse-i mezbûremden benim emrimle sâbıkā sekbânbaşı olan izzetli Hâşimzâde Murtaza Ağa’ya resm nâmıyla medfû‘u olan dört bin akçe dahi benim makbûlüm olup ol vechile sâlifü’z-zikr iki kıt‘a defterlerde tahrîr olunan cem‘an üç yük otuz dört bin dokuz yüz yirmi altı akçe hissemin iki yük altmış bin yedi yüz yirmi akçesini ahz u kabz ve istifâ edip mâ‘adâsı olan altmış sekiz bin iki yüz altı akçe ile hâric-i ez-defter hissem olan yüz kırk beş bin yetmiş dört akçe mezbûr el-Hâc Mahmud yedinde bâkī kalmış iken bin yüz dört senesi Muharremi’l-haramı’nın üçüncü günü zikrolunan defterlerde tahrîr olunan hisse-i mezbûreyi tamamen ahz u kabz ve istifâ eyledim deyü defter-i mezkûrlarda tahrîr olunan meblağdan makbûzâtımdan bâkī kalan meblağ-ı mezbûr altmış sekiz bin iki yüz altı akçe hakīkatde deyni olup zâhiren istifâ olunmak üzere huzûr-ı hâkim-i şer‘de muvâza‘aten ikrâr ve i‘tirâf ile husûs-ı mezbûr içün hüccet tahrîr olunsun ba‘dehû ben sana beş yüz guruş vereyim deyü merkūm el-Hâc Mahmud beni tagrîr etmekle ben dahi târih-i mezbûrda Mahmudpaşa mahkemesinde nâibü’ş-şer‘ olan Sunullah Efendi b. Ali kıbelinden husûs-ı mezbûru tahrîre mezûn olan Abdülbaki Efendi b. Ali’nin mahalle-i mezbûrda vâki‘ müteveffiyân-ı mezbûrânın babaları merhûm Esad Ağa’nın ile’l-vefât sâkin olduğu menzilde udûl-i Müslimîn huzûrunda akd eylediği meclis-i şer‘de müteveffiyân-ı mezbûrânın terekelerinden para üç akçe hesâbınca bana ancak üç yük otuz bir bin üç yüz seksen iki akçe isâbet eyledi meblağ-ı mezbûrun yirmi dört bin yedi yüz yirmi akçesini mezbûr el-Hâc Mahmud müteveffiyân-ı mezbûrânın teçhîz ve tekfînlerine sarf ve on dört bin akçesini mûmâ-ileyh Hâşimzâde Murtaza Ağa’ya dafi‘ u teslîm ve iki yük doksan iki bin altı yüz altmış akçesini ben ahz u kabz eyledim deyü mezbûrun va‘dine mağrûren muvâza‘aten ikrâr edip hüccet tahrîr olunmamağla mâ‘adâ-yı mezkûreyi bana edâda imtinâ eder hâlâ suâl olunup sâlifü’z-zikr defterlerde tahrîr olunan meblağdan makbûzâtımdan bâkī meblağ-ı merkūm altmış sekiz bin iki yüz altı akçe ile hâric-i ez-defter yüz kırk beş bin yetmiş dört akçeyi bana red ve teslîmine mezbûr el-Hâc Mahmud’a tenbîh olunmak matlûbumdur dedikde gıbbe’s-suâl mezbûr el-Hâc Mahmud cevâbında ancak müteveffiyân-ı mezbûrânın terekelerinden işbu iki kıt‘a defter-i kassâm nâtık olduğu üzere müdde‘iye-i mezbûreye üç yük otuz dört bin dokuz yüz yirmi altı akçe isâbet ve ben ahz u kabz etmiş iken tereke-i müteveffiyân-ı mezbûrândan ancak üç yük otuz bir bin üç yüz seksen iki akçe mezbûr La‘lgûn kendüye isâbet ve meblağ-ı mezbûrun yirmi dört bin yedi yüz yirmi akçesini mezbûrânın techîz ve tekfînlerine sarf ve on dört bin akçesini mûmâ-ileyh Hâşimzâde Murtaza Ağa’ya ben def‘ u teslîm ve mâ‘adâ iki yük doksan iki bin altı yüz altmış iki akçesini nukūd ve celî ve gayr-ı celî eşyâ-i ma‘lûmemi ahz u kabz etmek üzere müdde‘iye-i mezbûre La‘lgûn meclis-i mezbûrda ikrâr ve i‘tirâf etmekle işbu hüccet tahrîr olunmuşidi deyü müdde‘iye-i mezbûreyi ber-vech-i muharrer tağrîr eylediğini ve hüccet-i merkūme muvâza‘aten tahrîr olunduğundan ve hâric-i ez-defter tereke-i müteveffiyân-ı mezbûrândan yüz kırk beş bin yetmiş dört akçe dahi kabzını inkâr edicek müdde‘iye-i mezbûreden müdde‘âsına beyyine taleb olundukda udûl-i Müslimînden ve mahalle-i mezbûre sükkânından olup zeyl-i hüccet-i mezbûrede isimleri mastûr olan şuhûddan olmağla zât-ı mezbûreyi ma‘rifet-i şer‘iyye ile ârifân imâm vekili eş-Şeyh Ahmed Efendi b. Hüseyin ve Müezzin Fazlullah Çelebi b. Ahmed nâm kimesneler li ecli’ş-şehâde meclis-i şer‘a hazırûn olup isre’l-istişhâd fi’l-hakīka bin yüz dört senesi Muharremi’l-haramı’nın üçüncü günü zikrolunan defterlerde tahrîr olunan hisse-i mezbûreyi [85a] tamamen ahz u kabz ve istifâ eyledim deyü makbûzâtından mâ‘adâ meblağ-ı bâkī-i mezbûr altmış sekiz bin iki yüz altı akçe hakīkatte deyni olup zâhiren istifâ olunmak üzere huzûr-ı hâkimde muvâza‘aten ikrâr ile husûs-ı mezbûru nâtık hüccet tahrîr olunsun ba‘dehû beş yüz guruşunu sana vereyim deyü merkūm el-Hâc Mahmud müdde‘iye-i mezbûre La‘lgûn bizim huzûrumuzda tağrîr etmekle ol dahi mezbûr Abdülbaki Efendi’nin akd eylediği meclis-i mezbûrda vasîyy-i mezbûrun masrûfâtından mâ‘adâ iki yük doksan iki bin altı yüz altmış akçesini ben ahz u kabz eyledim deyü mezbûrun va‘dine mağrûre olmakla muvâza‘aten ikrâr ve i‘tirâf edip hüccet-i mezbûre muvâza‘aten tahrîr olunmuşidi hâlâ meblağ-ı bâkī-i mezbûr altmış sekiz bin iki yüz altmış altı akçeyi müdde‘iye-i mezbûre içün mezbûr el-Hâc Mahmud’da hakk-ı taleb ve ahzı vardır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra müdde‘iye-i mezbûreden merkūm el-Hâc Mahmud’un hâric-i ez-defter yüz kırk beş bin yetmiş dört akçe dahi kabzını mübeyyene beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka tereke-i müteveffiyan-ı mezbûrândan müdde‘iye-i mezbûre La‘lgûn’ün hissesine hâric-i ez-defter yüz kırk beş bin yetmiş dört akçe isâbet ve meblağ-ı mezbûru ahz u kabz etmeyip ol vechile ziyâde mezbûrenin dahi teslîm üzerine lâzım gelmediğine mezbûr el-Hâc Mahmud’a yemîn teklîf olundukda ol dahi hasbe’l-mesûl yemîn billahi te‘âla etmeğin mûcebiyle meblağ-ı mezbûr altmış sekiz bin iki yüz altı akçeyi müdde‘iye-i mezbûreye bi tarîkı’d-damân edâya mezbûr el-Hâc Mahmud’a tenbîh ve hâric-i ez-defter ziyâde mezbûre talebi içün mezbûre Laligün’e bilâ-beyyine bî-vech mu‘ârazadan ba‘de’l-men‘ yine mezbûr La‘lgûn meclis-i şer‘de merkūm el-Hâc Mahmud mahzarında ikrâr ve i‘tirâf edip ânifen bana edâsına tenbîh olunan altmış sekiz bin iki yüz altı akçenin sekiz bin iki yüz altı akçesini hîn-i vesâyetinde düyûn-ı ma‘lûme tahsîli içün ücret-i mübâşiriyye ve kendinin ecr-i misline takās ve mahsûb olunup mâ‘adâ altmış bin sağ akçeyi işbu meclisde yedinden tamamen ahz u kabz eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min-Şevvali’l-mükerrem li-sene seb‘a ve mie ve elf min-hicreti men lehu’l-izz ve’ş-şeref. Şuhûdü’l-hâl: Mustafa Ağa Muhtesib-i Âsitâne, es-Seyyid Ahmed Efendi et-tabîb, Hasan Beşe el-mübâşir, Salih Efendi b. ( ), İbrahim Çelebi b. Ahmed, el-Hâc Salih, el-Hâc Mehmed b. İbrahim, el-Hâc Halil Efendi b. Mehmed.