İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 368 Hüküm no: 272 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail ve Ali adlı kardeşlerin yeniden inşa ettikleri menzilin komşuları Mehmed b. Musa’nın evine verdiği zarardan men edilmeleri Husûs-ı âti’z-zikrin mahâllinde istimâ‘ ve tahrîri bâbında fermân-ı âlî vârid olmağın imtisâlen leh savb-ı şer‘-i mutahharadan keşif nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mâr lardan Mehmed Halîfe b. İshak ve Ali Halîfe b. Abdullah ile mahmiye-i İstanbul’da Haydarpaşa mahallesinde yine Haydar Paşa Vakfı’ndan icâreteyn-i ma‘lûmeteyn ile el-Hâc Mehmed b. Musa nâm kimesnenin tasarrufunda olan menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz kimesneler mahzarlarında akd-i meclis-i şer‘-i şerîf eylediğinde işbu bâ‘isü’l-kitâb mezbûr el-Hâc Mehmed meclis-i ma‘kūd-ı mezbûrda mahalle-i mezbûre sükkânından el-Hâc İsmail ve el-Hâc Ali ibney el-Hâc Mehmed nâm karındaşlar mahzarlarında üzerlerine da‘vâ ve takrîr-i kelâm edip mezbûrân el-Hâc İsmail ve el-Hâc Ali işbu menzilim mukābilinde vâki‘ kadîmî tahtânî olan menzili ba‘de’l-harîk müceddeden binâ ve ihdâs eyledikleri işbu üç tabaka menzillerinin on adet pencerelerinin benim menzilimin makarr-ı nisvân olan mevâzi‘ine havâlesi olmağla hâlâ nazar olunup men‘ u def‘ etdirilmek matlûbumdur dedikde gıbbe’s-suâl mezbûrân el-Hâc İsmail ve el-Hâc Ali cevâblarında menzil-i mezkûrları kadîmden tahtânî olduğunu her biri ba‘de’l-ikrâr mi‘mârân-ı mezbûrân ve Müslimûn-ı mezbûrûn ile münâza‘un-fîhâ olan mevâzi‘ine nazar eylediklerinde fi’l-hakīka mezbûrân el-Hâc İsmail ve el-Hâc Ali’nin on aded muhdes pencerelerinin müdde‘î-i mezbûr el-Hâc Mehmed’in menzilinin makarr-ı nisvân olan mevâzi‘ine havâlesi olduğu zâhir ve mütehakkık olmağın mûcebiyle mezbûrân el-Hâc İsmail ve el-Hâc Ali’ye zikrolunan on adet pencerelerinin havâlelerini def‘a tenbîh eylediğini mevlânâ-yı mezbûr mahâllinde ketb u tahrîr ve ma‘an ba‘s olunan el-Hâc Ali b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ıhî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâlisi aşer min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Mehmed Efendi b. Abdüllatif, Mesud Efendi b. Ali Efendi, Osman Ağa b. Abdullah, Mustafa Çelebi b. Müstecâb, el-Hâc İsmail b. Abdullah, Murad b. Abdullah.