İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 369 Hüküm no: 273 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ali Ağa ile Asiye arasında her ikisi de küçük yaşta iken yapılan nikah akdinin geçerli olmadığı Vilâyet-i Anadolu’da Kasaba-i Edincik mahallâtından Karacamahalle ahâlîsinden olup sulbiye-i sagīre kızı Asiye’nin babası ve velîsi el-Hâc Hasan b. Ahmed dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i âlîde kasaba-i mezbûrede Karahisar mahallesinde sâkin iken bundan akdem vefât eden Mehmed b. Ali Ağa b. Hasan nâm sagīrin li-ebeveyn ammi ve hasran vârisi olan Hasan Çelebi nâm sagīrin tesviye-i umûruna vasîyy-i şer‘îsi olan Muslu b. el-Hâc Yusuf mahzarında üzerine da‘vâ ve takrîr-i kelâm edip târih-i kitâbdan üç buçuk sene mukaddem kızı sagīre-i mezbûre Asiye’yi benim iznimle sagīr-i mezbûr Mehmed’in veliyy-i akrebi işbu mezbûr Hasan Çelebi sagīr bulunmağla kasaba-i mezbûrede nâibü’ş-şer‘ olan Mehmed Efendi izniyle iki yüz guruş mehr-i mü’eccel tesmiyesiyle sagīr-i mezbûr Mehmed’e inkâh ve tezvîc olunup kızım sagīre-i mezbûre Asiye müteveffâ-yı mezbûrun zevce-i menkûhası oldukdan sonra mezbûr Mehmed hâlâ fevt olmağla terekesinden rub‘[ı] zevcesi kızım mezbûre Asiye’ye ve selâse-i erbâ‘ı ammi mezkûr Hasan Çelebi’ye ırsen isâbet etmiş iken müteveffâ-yı mezbûrun mecmû‘-ı terekesine vasîyy-i mezbûr Muslu bi’l-vesâye vâzı‘u’l-yed olmağın hâlâ suâl olunup müteveffâ-yı mezbûrun terekesinin rub‘ı kızım sagīre-i mezbûre içün bana teslîme vasîyy-i mezbûra tenbîh olunmak matlûbumdur dedikde gıbbe’s-suâl vasîyy-i merkūm cevâbında târih-i mezbûrda kasaba-i merkūmeli Semiz İlyas Câmi‘i imâmı olan [86a] Mustafa Efendi sagīrân-ı mezbûrân Mehmed ve Asiye’den birinin velîsi hazır olmayıp ve izinleri veyâ vekîlleri yoğiken ve ma‘rifet-i hâkimü’ş-şer‘ dahi bulunmamış iken mezbûr el-Hâc Hasan’ın rüfekâsından olup tarafeyne ecnebiler olan el-Hâc Hüseyin ve Macarzâde el-Hâc Ali nâm kimesneler sagīre-i mezbûre Asiye’yi müteveffâ-yı mezbûr Mehmed’e ber-vech-i muharrer bilâ-izn akd eylemiş hatta husûs-ı merkūmu kasaba-i merkūmede hâlâ nâibü’ş-şer‘ olup bâ-fermân-ı âlî teftîşe memûr olan Ahmed Efendi b. el-Hâc Receb mahâllinde vukūf-ı tâmm-ı olan bî-garaz Müslimînden istifsâr eyledikde akd-i mezkûrda sagīrân-ı mezbûrândan birinin velîsi hazır olmayıp ve izni veyâ vekîli yoğiken ve ma‘rifet-i hâkimü’ş-şer‘ dahi bulunmamış iken ecnebiden olan mezbûr el-Hâc Hüseyin ve Macarzâde el-Hâc Ali ber-vech-i muharrer akd-i fâsid akd eyledikleri şer‘an zâhir ve müte‘ayyen olmağla husûs-ı mezbûr der-i devlet-medâra arz u i‘lâm olunup hüccet dahi tahrîr olunmuşidi deyü mazmûnu min-külli’l-vücûh takrîr-i meşrûhuna mutâbık nâib-i merkūm imzâsıyla mümzât ve hatmiyle mahtûm bir kıt‘a arz ve bir hüccet ibrâz edip akd-i mezbûr izn-i hâkimü’ş-şer‘le olduğunu inkâr edicek müdde‘î-i mezbûrdan akd-i mezbûrun ber-vech-i muharrer izn-i hâkimü’ş-şer‘ ile olduğuna beyyine taleb olundukda ityân-ı beyyineden izhâr-ı acz edip tahlîf dahi lâzım gelmemeğin mûcebiyle müdde‘î-i mezbûr bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâdis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: <> umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, Fahrü’l-eşbâh ve’l-a‘yân Mehmed Ağa ser-çavuşân, fahrü’l-akrân Odabaşı Mustafa Ağa, Mehmed Ağa b. Ali.