İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 370 Hüküm no: 274 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Ali’nin Mehmed Ağa b. Yusuf’tan aldığı iki yüz guruşu iade etmesi Sâbıkā Dergâh-ı âlî yeniçerilerinin altıncı sekbânlarına mahsûs oda ahâlîsinin çorbacıları olan Mehmed Ağa b. Yusuf meclis-i şer‘-i şerîf-i enverde bundan akdem Dergâh[-ı âlî] yeniçerileri ağası oldukdan sonra Bosna muhâfazasında iken fevt olan Abdullah Paşa b. Abdülmennan’ın hayatında menzil kethudâsı olan el-Hâc Hasan b. Ali nâm kimesne mahzarında üzerine da‘vâ ve takrîr-i kelâm edip mûmâ-ileyh Abdullah Paşa yeniçeri ağası iken ben ber-vech-i muharrer altıncı sekbânlarının çorbacısı olmağla paşa-yı mûmâ-ileyh tarafından çorbacılık mektûbu mezbûr el-Hâc Hasan’a geldikde ol târihde kul kethudâsı olan Çelebi Mehmed Ağa’nın kethudâsı içün verdiğim yüz guruşdan mâ‘adâ mezbûr el-Hâc Hasan bi gayr-ı hakkın iki yüz guruşumu ahz u kabz ve kendi mesârifine sarfla istihlâk edip zikrolunan mektûbu teslîm etmeğin hâlâ suâl olunup meblağ-ı mezbûr iki yüz guruşu bana red ve teslîme tenbîh olunmak matlûbumdur dedikde gıbbe’s-suâl mezbûr el-Hâc Hasan cevâbında zikrolunan çorbacılığın yeniçeri ağalarına iki yüz guruş câizesi olmağla müdde‘î-i mezbûr Mehmed Ağa zikrolunan iki yüz guruşu paşa-yı mûmâ-ileyhe def‘ u teslîm etmek içün bi tarîkı’l-emâne bana def‘ u teslîm ben dahi ahz u kabz ve müdde‘î-i mezbûrun emrine binâ’en mûmâ-ileyh Abdullah Paşa’ya hâl-i hayatında def‘ u teslîm edip ol vechile meblağ-ı mezbûr mütâlebesinden zimmetim berî olmuşdur deyü da‘vâyı def‘ edicek gıbbe’l-istintâk ve’l-inkâr mezbûr el-Hâc Hasan’dan def‘-i mezbûru mübeyyene beyyine taleb olundukda mezbûr el-Hâc Hasan ityân-ı beyyineden izhâr-ı acz ile istihlâf etmeğin fi’l-hakīka mebâğ-ı merkūm iki yüz guruşu mûmâ-ileyh Abdullah Paşa’ya def‘ u teslîm etmek içün bi tarîkı’l-emâne def‘ etmeyip ve ber-vech-i meşrûh paşa-yı mûmâ-ileyhe teslîme emretmeyip ol vechile meblağ-ı mezbûr mütâlebesinden merkūm el-Hâc Hasan’ın zimmetini berî olmadığına müdde‘î-i mezbûr Mehmed Ağa’ya yemin teklîf olundukda ol dahi hasbe’l-mesûl yemîn billahi te‘âla etmeğin mûcebiyle meblağ-ı mezbûr iki yüz guruşu müdde‘î-i mezbûra red ve teslîme mezkûr el-Hâc Hasan’a tenbîh olunup mâ vaka‘a bi’t-taleb ketb olundu. Fi’l-yevmi’l-âşir min-Şevvali’l-mükerrem li-sene seb‘a ve mie ve elf. Şuhûdü’l-hâl: İbrahim Çelebi b. Ahmed, Mahmud b. Veli, el-Hâc Halil Efendi b. Mehmed, Ali Beşe çukadâr, Ebûbekir Beşe b. ( ).