İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 371 Hüküm no: 275 Orijinal metin no: [85b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Muslu b. Osman’ın Hemşin kazasına bağlı Çat karyesi ve sair mahallerde ikamet eden zimmîlerden haksız yere aldığı beş yüz guruşu iade etmesi
Vilâyet-i Anadolu’da Trabzon sancağında Hemşin kazâsı tevâbi‘inden Çat nâm karye ahâlîsinden Melek ta‘bîr olunur karye-i mezbûrenin kethudâları olmağla ced isminden müstağnî olan Melek Ordik v. Manok ve Pilos nâm karye ahâlîsinden Savan v. Avanos ve Bestan v. Yani ve Sayhun nâm zimmî karyede sâkin Varton v. Mardiros ve Lalahan Arakil ve Keşve nâm karyede Kuyumcu v. Kahne ve Şişonlu v. Keyş ve Mefrinis nâm karyeden Karid v. Hohas ve Anderyos v. Gülâbî ve Vartan v. Yani ve Emir nâm karyeden Markar v. İlya ve Serkiz v. Kirakoz ve Mellâh nâm karyeden Aritun v. Karabet ve Kirkor v. Milan ve Mahmud b. Abdullah ve Zümeriye nâm karyede Varton v. Sağra ve Demirci v. Tavaş ve Agop v. Hobyar ve Eksandeye? nâm karye sükkânından Demirci v. Aritun ve Evdik v. Avanos ve Vartok v. Oseb ve Mardiros v. Filyos ve Sahak v. Rayhan ve Pragul v. Yani ve Bragova nâm karyeden Agop v. Kirakoz ve Manol v. Biçker ve Markar v. Reyhan v. Küşter ve Kirakoz v. Makraz ve Ohan v. Mardiros ve [86a] ve Seferhan v. Arakil ve Bağdasar v. Oseb ve Ovanos ve Ohan v. Oseb ve Dabil v. Ovak nâm zimmîler taraflarından ber-vech-i âtî vekâlet iddi‘â eden Agop Keşiş v. Hıristo nâm zimmî meclis-i şer‘-i şerîf-i enverde bin yüz iki senesinde kazâ-i mezbûrda Hemşin mukāta‘ası emîni Mahmud Ağa’nın etbâ‘ından mukāta‘a-i mezbûre emvâlini tahsildârı olan el-Hâc Muslu b. Osman mahzarında bi’l-vekâle üzerine da‘vâ ve takrîr-i kelâm edip müvekkillerim mezbûrûn kadîmü’l-eyyâmdan beher sene cizyeleri olmak üzere üç bin vakıyye bal mumu matbah-ı âmireye ve bin beş yüz guruş Gönye kal‘ası mevâcibi içün veregelmişler iken sene-i mezbûrede üzerlerinden bâ-fermân-ı âlî ref‘ olunup hâlâ haraç verirler iken mezbûr el-Hâc Muslu kazâ-i mezbûrdan mukāta‘a-i mezbûre emvâlini ol vakitde tahsîl ederken ben zikrolunan üç bin vakıyye bal mumu ile beş yüz guruşu yine cizye bedeli olmak üzere tahsîl ederin deyü bi gayr-ı hakkın müvekkillerim mezbûrûnu ahz ve beş yüz guruşların yedlerinden ahz u gasb ve istihlâk etmekle meblağ-ı mezbûru mezbûr el-Hâc Muslu’dan taleb ve da‘vâ ve ahz u kabza ve kabzın îsâle mütevakkıf olduğu umûrun küllîsine işbu yedimde olan hüccet mûcebince beni taraflarından vekîl ve nâib-i menâb nasb u ta‘yîn ben dahi ber-vech-i muharrer vekâlet-i mezbûremi kabûl etmekle bi’l-vekâle meblağ-ı mezbûr beş yüz guruşu taleb ederim suâl olunup bana teslîme tenbîh olunmak matlûbumdur dedikde gıbbe’s-suâl mezbûr el-Hâc Muslu cevâbında bâlâda zikri mürûr etdiği vech üzere mezbûrûnun yedlerinde bi gayr-ı hakkın beş yüz guruşlarını ahz u gasb ve istihlâk etdiğini ikrâr lâkin mezbûrun vech-i muharrer üzere vekîli olduğunu bi’l-külliye inkâr edicek vekîl-i mezbûrdan ber-vech-i muharrer müdde‘âsını mübeyyene beyyine taleb olundukda udûl-i Müslimînden olup vilâyet-i mezbûrede Mapavri kazâsı ahâlîsinden Abdurrahman b. İbrahim ve Abdülbaki Çelebi b. Mahmud nâm kimesneler li ecli’ş-şehâde meclis-i şer‘-a hâzırân olup istişhâd olundukda fi’l-hakīka ber-vech-i muharrer mülk ta‘bîr olur karyelerin kethudâları olan mezbûrûn ve Ordik v. Manuk ve Sader v. Avanos ve Bestan v. Yani ve Varton v. Mardiros ve Lalahan v. Arakil ve Kuyumcu v. Kahne ve Şişonlu v. Keşiş ve Karabet v. Kukaş ve Anderyos v. Gülâbî ve Vatan v. Yani ve Markar v. İlya ve Sergiz v. Kirakoz ve Aritun v. Karabet ve Kirkor v. Milan ve Mahmud b. Abdullah ve Varton v. Sağar ve Demirci v. Tavaş ve Agop v. Hobya ve Demirci v. Aritun v. Erdik v. Avanos ve Varton v. Oseb ve Mardiros v. Filyos ve Sahak v. Rayhan ve Reyhan v. Küşter ve Kirakos v. Mikras ve Ohan v. Mardiros ve Seferhan v. Arakil ve Bağdasar v. Oseb ve Avanos v. Mardiros ve Aknos v. Bağdasar ve Ohan v. Oseb ve Vabel v. Avak nâm zimmîler meblağ-ı mezbûr beş yüz guruşu vech-i muharrer üzere mezbûr el-Hâc Muslu’dan taleb ve da‘vâ ve ahz u kabza ve kabz ve îsâle mütevakkıf olduğu umûrun küllîsine bizim huzûrumuzda mezbûr Agop Keşiş v. Hıristo’yu taraflarından vekîl ve nâib-i menâb nasb u ta‘yîn etdiklerinde ol dahi vekâlet-i mezbûreyi kabûl etmişidi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle vekâletine ba‘de’l-hükm meblağ-ı mezbûr beş yüz guruşu mezbûr Agop Keşîş’e red ve teslîme mezbûr el-Hâc Muslu’ya tenbîh birle mâ hüve’l-vâki‘ bi’t-taleb ketb olundu.
Fi’l-yevmi’s-sânî ve’l-ışrîn min-Şevvali’l-mükerrem li-sene seb‘a ve mie ve elf.
Şuhûdü’l-hâl: Abdurrahman Efendi b. Mehmed Efendi, Kocamustafapaşa İmâmı Mustafa Efendi, İbrahim Çavuş b. Sefer, İbrahim Çelebi b. Ahmed.
|