İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 377 Hüküm no: 281 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi b. Halil’in rüşvet olarak Mehmed Çelebi b. Ahmed’den aldığı paradan kalan borcunu ödemesi Mahrûse-i Galata’da Sultân Bâyezid mahallesinde sâkin el-Hâc Mehmed Çelebi b. Ahmed meclis-i şer‘-i şerîf-i enverde medîne-i Üsküdar’da Çavuşderesi kurbünde sâkin Abdullah Çelebi b. Halil mahzarında üzerine da‘vâ ve takrîr-i kelâm edip bundan akdem mezbûr Abdullah Çelebi’ye işbu yedime verdiği temessükü mûcebince bir husûsun temşiyeti içün malımdan yüz esedî guruşumu bi tarîkı’r-rüşve def‘ u teslîm ol dahi ber-vech-i muharrer ahz u kabz etdiğinden sonra husûs-ı mezbûre vücûda gelmemekle medfû‘um olan meblağ-ı mezbûru mezbûr Abdullah Çelebi dahi kendi mesârifine sarfla istihlâk etmekle on dört guruşunu yedinden ahz u kabz edip bâkī zimmetinde seksen altı guruş hakkım kalmağla suâl olunup alıverilmesi matlûbumdur dedikde gıbbe’s-suâl mezbûr Abdullah Çelebi cevâbında fi’l-hakīka mezbûr el-Hâc Mehmed Çelebi yedinden ber-vech-i muharrer yüz esedî guruşu bi tarîkı’r-rüşve ahz ve kendi mesârifine sarfla istihlâk etmekle meblağ-ı bakī-i mezbûr seksen altı guruş zimmetinde deyni olduğunu ikrâr u i‘tirâf etmeğin alâ mûcib-i i‘tirafihî meblağ-ı mezbûr seksen altı guruşu mezbûr el-Hâc Mehmed Çelebi’ye edâ ve teslîme mezbûr Abdullah Çelebi’ye tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: İb. Çelebi b. Ahmed, Mustafa b. Şaban, İbrahim Çelebi b. Mehmed, Receb b. Süleyman, İsmail Çelebi b. Mustafa, Ahmed b. Ahmed.