İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 378 Hüküm no: 282 Orijinal metin no: [88b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kapan-ı dakīk uncuları kethudası İsmail’in yerine Mustafa Çelebi b. Mehmed’in tayini Mahmiye-i İstanbul’da Kapan-ı dakīk uncularından el-Hâc Mehmed b. İbrahim ve el-Hâc Mustafa b. Kahraman ve el-Hâc Süleyman b. Ali ve Mehmed Çelebi b. Mustafa ve Ali Beşe b. Ramazan ve el-Hâc Ahmed b. Hasan ve Mehmed b. Davud ve el-Hâc Hasan b. Davud ve Yusuf Beşe b. Mahmud ve İbrahim b. Mustafa ve el-Hâc Mehmed b. Rasûl ve Mustafa b. Abdullah ve Abdurrahman b. Mustafa ve Ahmed b. Abdullah ve İbrahim b. Abdullah ve el-Hâc İbrahim b. Receb ve Osman b. Mehmed ve Ahmed b. Mustafa ve el-Hâc Ali b. Mustafa ve Yorgaki v. Panayot ve Dimitri v. Anaştaş ve Yanaki v. Panayot ve Yorgi v. Kosta ve Nikola v. Todori ve Yorgaki v. Yani ve Astama v. Mihal ve Kosta v. Todori ve Yorgi v. Yani ve Dimitri v. İlya ve Yani v. Dimitri ve sâirleri meclis-i şer‘-i şerîf-i enverde işbu râfi‘ü’l-kitâb Mustafa Çelebi b. Mehmed nâm kimesne mahzarında her biri takrîr-i kelâm ve ta‘bîr ani’l-merâm edip mukaddemâ kethudâmız olan İsmail fevt olmağla yerine kıbel-i şer‘den bir kethudâ nasb u ta‘yîn olunmak lâzım ve mühim ve işbu merkūm Mustafa Çelebi umûr-ı kethudâlığı görmeğe her vechile kādir olmağla mezbûru üzerimize kethudâ ihtiyâr eyledik hâlâ kıbel-i şer‘den dahi mezbûr Mustafa Çelebi üzerimize kethudâ nasb u ta‘yîn olunmak matlûbumuzdur dediklerinde kazıyye vech-i muharrer üzere olduğunu sikāt-ı makbûletü’l-kelimât ihbâr dahi etmeleriyle mezbûr Mustafa Çelebi merkūmûnun üzerlerine kıbel-i şer‘den kethudâ nasb u ta‘yîn olundukda ol dahi kabûl ve merâsimini edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: Mustafa Çelebi yiğitbaşı, el-Hâc Mehmed Çelebi b. İbrahim, el-Hâc Süleyman b. ( ), İbrahim Çelebi b. Ahmed, Ali b. Bali, el-Hâc Süleyman Ağa, Hüseyin Çelebi b. Mehmed.