İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 378 Hüküm no: 283 Orijinal metin no: [88b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murg-ı Behiştî lakabıyla bilinen Ali Ağa b. İbrahim’in Mehmed b. Abdülmuttalib’e olan borcunu ödemesi Mahmiye-i İstanbul’da el-Hâc Küçük mahallesi sükkânından işbu râfi‘ü’l-kitâb el-Hâc Mehmed b. Abdülmuttalib nâm kimesne meclis-i şer‘-i şerîf-i enverde Mürg-i bihiştî demekle ma‘rûf Ali Ağa b. İbrahim nâm kimesne mahzarında üzerine da‘vâ ve takrîr-i kelâm edip abd-i memlûk ve me’zûnum olup bundan akdem vefât eden İbrahim nâm kimesne hâl-i hayatında medîne-i Edirne’de benim malımdan mezbûr Ali Ağa’ya üç yüz esedî guruşumu ikrâz ve teslîm edip ol dahi iktirâz ve kabz u tesellüm ve kendi mesârifine sarfla istihlâk eyledikden sonra medîne-i Edirne’de rikâb-ı hümâyûnum kāimmakāmı olup vedâ‘-ı âlem-i fânî eden merhûm Osman Paşa huzûrunda dîvân-ı âlîde meblağ-ı mezbûru mezkûr Ali Ağa’dan taleb ve da‘vâ ve edâsına şer‘an tenbîh dahi olundukdan sonra meblağ-ı mezbûru kable’l-ahz abd-i memlûküm mezkûr İbrahim fevt olup meblağ-ı mezbûr üç yüz guruşu mezbûr Ali Ağa zimmetinden el-ân bâkī kalmağın hâlâ suâl olunup meblağ-ı mezbûru bana edâya mezbûr Ali Ağa’ya tenbîh olunmak matlûbumdur dedikde gıbbe’s-suâl mezbûr Ali Ağa cevâbında meblağ-ı mezbûru mezkûr İbrahim’den iktirâz ve kabz etmeyip gāib ani’l-meclis Telhîsî İsmail Ağa nâm kimesne [ile] beynimizde ma‘lûm ze‘âmet bedeli olan üç yüz guruş ile mezbûru benim üzerime havâle-i mu‘ayyene ile havâle eylediğinden mâ‘adâ hîn-i havâlede üçümüz bir meclisde bulunmayıp ve ba‘de’l-havâle kabûl dahi etmeyip [89a] ol vechile havâle-i tâmme bulunmamış idi deyip müdde‘î-i mezbûr el-Hâc Mehmed’in malından abd-i memlûkü ve me’zûnu merkūm İbrahim yedinden üç yüz guruş iktirâz ve kabzını bi’l-külliye inkâr edicek müdde‘î-i mezbûrdan müdde‘âsına mutâbıka beyyine taleb olundukda udûl-i ahrâr-ı ricâl-i Müslimînden olup târih-i mezbûrda medîne-i Edirne’de ve hâlâ mahmiye-i merkūmede zikrolunan el-Hâc Küçük mahallesinde sâkin Ocak-zâde Muslu Ağa b. Ali Ağa ve Ali Bey b. Mehmed nâm kimesneler li ecli’ş-şehâde meclis-i mezbûra hâzırân olup isre’l-istişhâd fi’l-hakīka müdde‘î-i mezbûr el-Hâc Mehmed’in abd-i memlûk ve me’zûnu müteveffâ-yı merkūm İbrahim hâl-i hayatında medîne-i Edirne’de müdde‘î-i mezbûrun malından işbu mezbûr Ali Ağa’ya üç yüz esedî guruşunu bizim huzûrumuzda ikrâz ve teslîm edip mezbûr Ali Ağa dahi iktirâz ve kabz ve tesellüm edip mezbûr Ali Ağa dahi iktirâz ve kabz ve tesellüm etmişidi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra mezbûr Ali Ağa meclis-i şer‘de fi’l-vâki‘ müdde‘î-i mezbûrun abd-i memlük ve me’zûnu mezbûr İbrahim yedinden müdde‘î-i mezbûrun malından üç yüz guruşu iktirâz ve kabz eylediğimden sonra medîne-i Edirne’de dîvân-ı âlîde benden ba‘de’d-da‘vâ edâsına tenbîh olunmağla meblağ-ı mezbûr üç yüz guruşu kefîlim olan Halebli Ahmed Ağa tamamen müdde‘î-i mezbûra edâ ve teslîm eyledi deyü da‘vâyı ref‘e mütesâddî olup lâkin bâlâda tahrîr olunan vech üzere iktirâz ve kabzını bi’l-külliye inkâr etmekle müdde‘î-i mezbûr müdde‘âsını ba‘de’l-isbât ve’l-hükm da‘vâyı ref‘i ref‘-i mu‘teber olmayıp tevkīf dahi kabûl etmemekle tenâkuz olmağın mûcebiyle müdde‘î-i mezbûr el-Hâc Mehmed’e meblağ-ı mezbûr üç yüz guruşu edâ ve teslîme mezbûr Ali Ağa’ya tenbîh olunup mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: Abbas Ağa b. Süleyman, el-Hâc Ebûbekir b. Sinan, Ömer Efendi b. Ömer, Receb Efendi nâib-i kapan, Muslu Ağa el-mübâşir, İbrahim Çelebi b. Ahmed, Halil Efendi b. Mehmed, Mehmed Efendi b. Hüseyin, ve gayruhum mine’l-huzzâr.