İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 380 Hüküm no: 284 Orijinal metin no: [89a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Bedros v. Zakarya’nın mirasının varisleri arasında taksimi Husûs-ı âti’z-zikrin mahâllinde ketb ve tahrîri bâbında fermân-ı âlî vârid olmağın imtisâlen-leh savb-ı şer‘-i mutahharadan keşif nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mârlarından Ali Halîfe b. Abdullah ve Osman Halîfe b. Abdülmennan ile mahmiye-i İstanbul’da Kâtib Kasım mahallesinde vâki‘ bir tarafdan Tavukçu Marat zimmî mülkü ve bir tarafdan Taşcı Mircan zimmi mülkü ve bir tarafdan ba‘zen Aritun zimmî ve ba‘zen Bedros menzili ve bir tarafdan tarîk-i âm ile mahdûd menziline varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî garaz kimesne[ler] mahzarlarında akd-i meclis-i şer‘-i şerîf eylediğinde menzil-i mahdûd-ı mezbûr yedinde mülk ve hakkı iken bundan akdem hâlik olan Bedros v. Zakarya nâm zimmînin verâseti zevce-i metrûkesi Gül bt. Melekser ve sulbiye kebîre kızları Lâal ve Nori nâm nasrâniyeler ve li-ebeveyn er karındaşı Asvador nâm zimmîye münhasıra olup ba‘dehû mezbûre Nori dahi hâlike olup verâseti vâlidesi mezbûre Gül ile li-ebeveyn karındaşı mezbûr Lâal’a ve ammisi mezbûr Asvador’a münhasıra olup ba‘dehâ mezbûre Gül dahi hâlike olup verâseti farzan ve redden sadriye kızı mezbûre Lâal’e münhasıra ve tashîh meseleleri bi tarîkı’l-münâsahati’ş-şer‘iyye yetmiş iki sehimden olup sihâm-ı mezbûrdan elli üç sehim mezbûre Lâal’e ve on dokuz sehm mezbûr Asvador’a isâbet eylediği şer‘an zâhir ve muhakkık oldukdan sonra mezbûr Asvador’a menzil-i mahdûd-ı mezbûrda olan ber-vech-i mübeyyen on dokuz sehim hisse-i şâyi‘asını mahalle-i mezbûre sükkânından Hüseyin Efendi b. el-Hâc Osman nâm kimesneye semen-i ma‘lûm-ı makbûzuna bey‘ ve temlîk ol dahi ber-vech-i muharrer iştirâ ve temellük ve kabûl etmekle mezbûr Hüseyin Efendi meclis-i ma‘kūd-ı mezbûrda Lâal’in zevci ve tarafından husûs-ı âti’z-zikre sâbitetü’l-vekâle vekîli olan Aritun v. İsayi nâm zimmî muvâcehesinde takrîr-i kelâm ve bast-ı merâm edip menzil-i mahdûd-ı mezbûr kābil-i kısmet olmağla müvekkile-i mezbûre ile beynimizde taksîm olunup ber-vech-i mübeyyen hisse-i şer‘iyyelerimiz ifrâz olunmak matlûbumuzdur dediklerinde gıbbe’t-tasdîkı’ş-şer‘î mi‘mârân-ı mezbûrân menzil-i mezbûru bi’l-muvâcehe misâha eylediklerinde tûlen ve arzen bi-hesâbı terbi‘î yüz seksen zirâ‘ binâ ma‘a’l-arsa ve yetmiş iki zirâ‘ arsa-i hâliyeden mezbûre Lâal’in ber-vech-i meşrûh elli üç sehmine yüz otuz iki zirâ‘ binâ ma‘a’l-arsa ve elli üç zirâ‘ arsa-i hâliye ve mezbûr Hüseyin Efendi’nin on dokuz sehmine kırk yedi zirâ‘ binâ [89b] ma‘a’l-arsa ve on dokuz zirâ‘ arsa-i hâliye isâbet eylediği lede’ş-şer‘ zâhir ve müte‘ayyen olmağın mezbûrân Arotin ve Bedros taraflarında vâki‘ tabaka-i ulyâda bir kebîr oda ve önünde vâki‘ bir sofa ve dehliz ve vüstâda vâki‘ bir oda ve dehliz ve tahtında ahur ve kömürlük ve zîr-i zemîni muhtevî yüz otuz iki zirâ‘ binâ ma‘a’l-arsa ve elli üç zirâ‘ arsa-i hâliye mezbûre Lâal’in elli üç sehm-i şâyi‘ine hisse ta‘yîn ve tahsîs olunup ve Tavukçu Marat tarafından ulyâda vâki‘ bir sagīr oda ve önünde dehliz ve tahta-pûş ve kenîf ve vüstâda dahi bir sagīr oda ve dehliz ve kenîf ve nerdübân ve sokak kapısını muhtevî kırk yedi zirâ‘ binâ ma‘a’l-arsa ve on dokuz zirâ‘ arsa-i hâliye mezbûr Hüseyin Efendi’nin on dokuz sehm-i şâyi‘ine ta‘yîn ve tahsîs olunup ve beynlerinde vâki‘ bi’r-i mâ yine kemâ-kân beynlerinde müşterek olmak üzere her biri hisse-i mu‘ayyene-i müfevvezelerini bi’l-asâle ve bi’l-vekâle kabz u kabûl eyleyip beynlerine alâmât-ı fâsıla vaz‘ eylediklerinden sonra vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Ali Çelebi b. Mustafa ve Mehmed Çelebi b. İbrahim ile meclis-i şer‘a gelip alâ vukû‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Halil Efendi b. Abdurrahman el-imâm, Hüseyin Efendi b. Mahmud el-müezzin, İbrahim Ağa b. Receb, Mehmed Ağa b. İbrahim, Mustafa b. Abdullah Çavuş-ı Kapan-ı dakīk.