İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 389 Hüküm no: 291 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Haçador v. Alemşah’ın terekesinin taksimi Husûs-ı âti’l-beyânın mahâllinde keşf ve tahrîri ve taksîmi içün fermân-ı âlî vârid olmağın imtisâlen lehû savb-ı şer‘-i mutahharadan keşif nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mâr lardan Üstâd Ali Halîfe b. Abdullah ve Osman Halîfe b. Abdurrahman ile mahmiye-i İstanbul’da Sulumanastır mahallesinde hâlik olan Haçador v. Alemşah nâm zimmîden hasran vârisleri zevce-i metrûkesi Varvara bt. Hıdır ile sulbiye kebîre kızları Sara ve Meyrem’e ve oğlunun sulbî kebîr oğlu Avanos’a intikāl edip yirmi dört sehimden üç sehmi zevcesi merkūme Varvara’nın ve sekiz sehmi kızları merkūmetân Sara ve Meyrem’in ve beş sehmi oğlunun oğlu merkūm Avanos’un mülk-i mevrûsları olup iki tarafdan Vartan oğlu Kigor nâm zimmî mülkü ve iki tarafdan tarîk-i âm ile mahdûd tabakāt-ı selâsesinde büyût-ı adîde ve matbah ve bi’r-i mâ ve kenîf ve sokak kapısını müştemil olan menzilin üzerine varıp zeyl-i rakīmde isimleri terkīm olunan Müslimîn mahzarlarında akd-i meclis-i şer‘-i şerîf eyledikde zâtlarını ma‘rifet-i şer‘iyye ile ârifân Papa Avraham v. Delot ve Kigor v. Kiragos nâm zimmîler ta‘rîfleriyle mu‘arrefetân olan mezbûretân Varvar ve kızı Meyrem meclis-i ma‘kūd-ı mezkûrda kezâlik zâtı mezbûran Papa Avraham ve Kinor ta‘rîfleriyle mu‘arrefe olan mezbûre Sara ile merkūm Avanos muvâcehelerinde her biri takrîr-i kelâm ve ta‘bîr ani’l-merâm edip menzil-i mezkûr vech-i meşrûh üzere mülk-i mûrisimiz olup kâbil-i kısmet olmağın beynimizde sihâm-ı mezkûremize göre taksim ve ikimizin hisselerimiz bir tarafa ve merkūm Sara ile merkūm Avanos’un hisseleri bir tarafa tefrîk olunup beynleri alâmât-ı fâsıla vaz‘ ile temyîz olunmak matlûbumuzdur dediklerinde gıbbe’t-tasdîkı’l-mu‘teber mi‘mârân-ı mezbûrân menzil-i mezkûru muvâcehelerinde misâha ve tahmîn eylediklerinde tûlen ve arzen bi-hesâbı terbi‘ iki yüz sekiz zirâ‘ binâlı arsası olup arsa-i mezkûreden yirmi altı zirâ‘ zevcesi mezbûre Varvara’nın üç sehim hissesine ve altmış dokuz zirâ‘ı sekizer parmak kızları merkūmetân Sara ve Meyrem’den her birinin sekizer sehim hiselerine ve kırk üç zirâ‘ sekizer parmak oğlunun merkūm Avanos’un beş sehim hissesine isâbet eylediği şer‘an zâhir ve mukarrer oldukdan sonra merkūm Kigork şarken mülkü tarafından vâki‘ ulyâda bir bâb oda ve nerdübân ve vüstâda bir bâb oda ve bir sagīr matbah ve dehliz ve nerdübân ve süflâda bir matbah ve kenîfi müştemil olan doksan beş zirâ‘ binalı arsa menzil-i mezkûrda olan cem‘an on üç sehim hisseleri içün mezbûre Sara ile merkūm Avanos’a bi’t-terâzi tahsîs ve ta‘yîn ve garben tarîk-i âm tarafında vâki‘ ulyâda nîm sofaları bir kebîr oda ve bir sofa ve bir sagīr matbah ve dehliz ve tahta-pûş ve vüstâda nîm sofalar bir bâb oda ve bir sofa ve bir matbah ve dehliz ve süflâda bir oda ve bir kilâr ve sokak kapısını müştemil olan yüz on üç zirâ‘ binâlı arsa menzil-i mezkûrda olan cem‘an on bir sehim hisseleri içün merkūmetân Varvara ve kızı Meyrem’e tahsîs ve ta‘yîn ve alâmât-ı fâsıla vaz‘ ile beynleri temyîz ve tebyîn olunduktan sonra merkūmetân Varvara ve kızı Meyrem’e ta‘yîn olunan yüz on üç zirâ‘ binâlı arsa min-ciheti’l-kıymet a‘lâ ve tefâvütü olup ve hisselerinden on yedi zirâ‘ on altı parmak binalı arsa ziyâde geçmekle mi‘mârân-ı mezbûrân ve Müslimîn-i mezkûrînin takvîm ve ihbârları üzere ziyâde lâzım gelen on üç bin yedi yüz beş akçeyi merkūmetân Varvara ve kızı Meryem mezbûre Sara ile merkūm Avanos’a red ve teslîm etmek üzere ve bi’r-i mâ haddeden vâki‘ olmağla beynlerinde müşterek olmak üzere her biri vech-i meşrûh üzere hisse-i müfreze-i mu‘ayyenelerini kabûl ve kabz eylediklerini mevlânâ-yı mezbûr mahâllinde ba‘de’t-tahrîr ma‘an irsâl olunan Mustafa Efendi b. Ömer ve Mehmed Çelebi b. İbrahim ile meclis-i şer‘a gelip alâ vukū‘ıhî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ min-Şevvali’l-mükerrem li-sene seb‘a ve mie ve elf. Şuhûdü’l-hâl: İsmail Ağa b. Mehmed, Hüseyin Çelebi b. Hasan, Ali Çelebi b. Mustafa, Mehmed Çelebi b. İbrahim, Ali Çelebi b. Abdullah, Ali Beşe b. Abdullah.