İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 391 Hüküm no: 292 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Çelebi b. Hasan’ın emanet olarak Hasan b. Abdullah b. Abdurrahman’a teslimini iddia ettiği eşya ve parayı ispatlayamadığı Mahrûse-i Bursa’da Tatar mahallesinde sâkin İsmail Çelebi b. Hasan meclis-i şer‘-i şerîf-i enverde mahmiye-i İstanbul’da Haydarhâne mahallesinde sâkin iken bundan akdem vefât eden el-Hâc Hasan b. Abdullah b. Abdurrahman’ın verâseti zevce-i metrûkesi Ayşe bt. Abdullah nâm hatun ile sulbiye kebîre kızı Fâtıma ve sagīre kızı Zeyneb’e münhasıra olduğu şer‘an zâhir ve müte‘ayyen olduktan sonra müteveffâ-yı mezbûrun terekesinden mezbûre Zeyneb’in kıbel-i şer‘den mansûbe vasîsi olmağla vâzı‘atü’l-yed olduğu mütehakkık olan mezbûre Ayşe mahzarında üzerine da‘vâ ve takrîr-i kelâm edip bin doksan dokuz senesinde ben Belgrad tarafına âzim olmağla müteveffâ-yı mezbûr el-Hâc Hasan b. Abdullah b. Abdurrahman’a hayatında eşyâ-i ma‘lûmemden bir saf kerake ve bir bürüncük gömlek ve bir altun başdestâr ve sekiz sahan ve beş tas ve bir kemer sîm raht ve bir alaca kaftan ve bir Şâmî alaca kaftan ve bir çuka dolama ve bir alaca Şâmî kuşak ve ma‘î çukaya [92b] kaplı bir zerdevâ kürküm ile nakd yüz yaldız altunumu bi tarîkı’l-emâne vaz‘ ve teslîm ol dahi ber-vech-i muharrer ahz u kabz etdiğinden sonra mezbûr el-Hâc Hasan kable’l-ahz mücehhelen fevt olmağla mezbûre Ayşe’ye suâl olunup mevcûd ise eşyâ-i muharrere-i mezbûrenin aynılarını müstehlik ise ba‘de’s-sübût kıymet-i şer‘iyyeleri ile meblağ-ı mezbûr yüz yaldız altununun mislini müteveffâ-yı mezbûrun yedinde olan tereke-i vâfiyesinden bana teslîme tenbîh olunmak matlûbumdur dedikde gıbbe’s-suâl mezbûre Ayşe cevâbında ber-vech-i muharrer müteveffâ-yı mezbûrun terekesine bi’l-vesâye vaz‘-ı yedini ikrâr lâkin müteveffâ-yı mezbûr hayatında vech-i meşrûh üzere emânet vaz‘ eylediği ma‘lûmum değildir deyücek müdde‘î-i mezbûrdan ber-vech-i muharrer müdde‘âsını mübeyyene beyyine taleb olundukda ityân-ı beyyine içün istimhâl etmekle mehl-i şer‘î birle ba‘de’l-imhâl izhâr-ı acz edip istihlâf etmeğin fi’l-hakīka ber-vech-i muharrer eşyâ-i muharrere-i mezkûrenin aynılarını müstehlek ise kıymet-i şer‘iyyelerini ve meblağ-ı mezbûrun mislini müteveffâ-yı mezbûrun terekesinden mezbûr İsmail Çelebi’ye reddi lâzım geldiği ma‘lûmu olmadığına mezbûre Ayşe’ye yemîn teklîf olundukda ol dahi alâ vefki’l-mesûl yemîn billâhi’l-aliyyü’l-a‘lâ etmeğin mûcebiyle bilâ-beyyine bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Fî 25 Şevval sene [1]107 Şuhûdü’l-hâl: Mehmed Çelebi b. Mustafa, el-Hâc Osman b. Abdullah, Yusuf b. Abdullah, el-Hâc Süleyman b. Mustafa, Salih Çavuş b. Ömer, İbrahim Çelebi b. Ahmed, Mehmed b. İdris ve gayruhum.