İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 392 Hüküm no: 293 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum Patriği Diyonyos v. Peraki v. Yanaki’nin İbrahim Ağa b. Ali b. Ahmed’e olan borcunu tamamen ödediği Mahmiye-i İstanbul’da Çerâğī Hamza mahallesinde sâkin iken bundan akdem vefât eden İbrahim Ağa b. Ali b. Ahmed’in verâseti zevce-i metrûkesi Ayşe bt. Abdullah nâm hatun ile babası mezbûr Ali’nin li-ebeveyn karındaşı olmağla min-ciheti’l-usûbeti’n-nesebiye Hüseyin Ağa b. Ahmed nâm kimesneye münhasıra olduğu şer‘an zâhir ve müte‘ayyen oldukdan sonra mezbûre Ayşe Hatun tarafından husûs-ı âti’z-zikri ikrâra vekîl olduğu mezbûrenin zâtını ma‘rifet-i şer‘iyye ile ârifûn mahalle-i mezbûre imâmı Mehmed Efendi b. Mehmed ve Mustafa b. Ali ve Şaban Ağa b. Ahmed şehâdetleriyle hasm-ı şer‘î-i câhid mahzarında şer‘an sâbit ve sübût-ı vekâletine hükm-i şer‘î lâhık olan Hasan Ağa b. Mehmed nâm kimesne meclis-i şer‘-i şerîf-i hatîr-i lâzımü’t-tevkīrde hâlâ Rum patriği olan işbu râfi‘ü’l-kitâb Kalminkos v. Rafael muvâcehesinde ikrâr-ı tâm ve takrîr-i kelâm edip müteveffâ-yı mezbûr İbrahim Ağa hâl-i hayatında kendi malından bin seksen üç senesi Muharremi’l-haramı gurresinde Rum patriği olan Diyonyos v. Peraki v. Yanaki’ye üç bin altı yüz guruş idâne ve teslîm ol dahi ba‘de’l-istidâne ve’l-kabz deyn-i mezbûru nâtık ve hatt u hatmini hâvî ve işbu kıt‘a temessükü mezkûr İbrahim Ağa’ya ba‘de’t-teslîm deyn-i mezbûrun iki bin beş yüz guruşunu mezbûr İbrahim Ağa’ya edâ ve teslîm ol dahi ahz u kabz edip deyn-i mezbûr’dan bin yüz guruşu bâkī kaldıkdan sonra yine mezbûr İbrahim Ağa bin seksen dört senesinde dahi kendi malından merkūm Diyoniyos’a bir def‘a dahi altı bin dokuz yüz guruşunu ber-vech-i muharrer idâne ve teslîm ol dahi ba‘de’l-istidâne ve’l-kabz kezâlik hat u hatmini hâvî ve deyn-sânî merkūmu nâtık işbu temessükü verip ba‘dehû meblağ-ı mezbûr altı bin dokuz yüz guruşun dahi bin yedi yüz doksan yedi guruşunu yine mezbûr İbrahim Ağa’ya edâ ve teslîm etmekle temessük-i sânî merkūmda tahrîr olunan deyn-i mezbûrdan beş bin yüz üç guruş bakī kalıp ve bin seksen yedi senesi Şa‘bânü’l-muazzamı’nda yine merkūm İbrahim Ağa malından bir def‘a dahi dört bin beş yüz guruşunu merkūm Diyonyos’a idâne ve teslîm ol dahi istidâne ve kabz ve işbu temessükü verip yine mezbûr İbrahim Ağa hâl-i hayatında bin seksen altı senesi Cemaziyelûlâsı’nda bi tarîkı’l-evfâ Partinos v. Yanaki v. Yorgi’ye kendi malından bin sekiz yüz yirmi beş guruşunu idâne ve teslîm ol dahi istidâne ve kabz ve hatt u hatmini hâvî işbu temessükü verdikden sonra evvelâ zikrolunan medyûn-ı merkūm Diyonyos zimmetinde üç kıt‘a temessük nâtık olduğu üzere idâne eylediği cem‘an on beş bin guruşdan vech-i muharrer üzere makbuzu olan dört bin iki yüz doksan yedi guruşdan bakī on bin yedi yüz üç guruş ve mezbûr Partinos’a idâne eylediği bin sekiz yüz yirmi beş guruş ki min-haysü’l-mecmû‘ on iki bin beş yüz yirmi sekiz guruşu kable’l-ahz mezbûr İbrahim Ağa fevt olup meblağ-ı bakī-i mezbûr bi’l-irsi’ş-şer‘î müvekkilem mezbûre ile mezbûr Hüseyin Ağa’ya isâbet eyledikden sonra bin doksan beş senesinde mahmiye-i mezbûrede Fener kapısı kurbünde Kürkçü Manolaki nâm zimmî menziline mezbûrân ile hesap gördüğümüzde mezbûr Diyonyos ber-vech-i muharrer teslîmâtından mâ‘adâ cihet-i karz-ı şer‘îden meblağ-ı mezbûr on bin yedi yüz üç guruşu ve merkūm Partinos kezâlik cihet-i karz-ı şer‘îden bin sekiz yüz yirmi beş guruş müteveffâ-yı mezbûr İbrahim Ağa’ya zimmetlerinde edâsı lâzım deynleri olduğunu alâ ruûsi’l-işhâd ve ikrâr ve i‘tirâf eyleyip meblağīn-i mezbûrîn cem‘an on iki bin beş yüz yirmi sekiz guruşa [93a] işbu Kanikos emir ve kabûlü hâvî kefâlet-i sahîha-i şer‘iyye ile kefîl olmağla meblağ-ı mezbûr on iki bin beş yüz yirmi sekiz guruş bundan akdem dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i âlîde ben ve mezbûr Hüseyin Ağa bi hükmi’l-kefâleti’l-mezkûre patrik-i merkūm Kanikos’dan ba‘de’d-da‘vâ müdde‘âmızı Mustafa Ağa b. Ali ve Şaban b. Ahmed şehâdetleriyle mezbûrûn muvâcehesinde şer‘an isbât etmekle meblağ-ı mezbûru bize edâsına hükm-i hâkimü’ş-şer‘ lâhık olmuşidi el-hâletü hâzihî beynimize muslihûn tavassut edip meblağ-ı mahkûmun bih mezbûr on iki bin beş yüz yirmi sekiz guruşdan <> müvekkilem mezbûr dahi rub‘ hisse-i şer‘iyyesine isâbet eden üç bin yüz otuz iki guruş da‘vâsından patrik-i merkūm Kanikos ile beş yüz guruş üzerine akd ve musâlaha olundukda ol dahi sulh-ı mezbûru kabûl ve bedel-i sulh olan meblağ-ı mezbûr beş yüz guruşu mezbûr Kanikos yedinden tamamen ahz u kabz edip mâ‘adâsı olan iki bin altı yüz otuz iki guruşu mezbûrdan müteveffâ-yı mezbûr İbrahim Ağa ile ile’l-vefât ve kendi ile târih-i kitâba gelince beynlerinde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûle müte‘allika âmme-i de‘âvî ve muhâsamât ve eymân ve mutâlebâtdan aslen mezbûrân Diyonyos ve Partinos ile kefîl-i mezbûr Kanikos ve âhar kefîlleri olan sâir metrepolidlerin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledi min-ba‘d târih-i kitâba gelince vechen mine’l-vücûh ve sebeben mine’l-esbâb da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşar min-Şevvali’l-mükerrem li-sene 1107 Şuhûdü’l-hâl: Umdetü’l-mevâli’l-hükkâm Ahmed Efendi el-kādî be-Selanik hâlâ, fahrü’l-akrân Hasan Ağa mi‘mâr-ı sâbık, Mustafa Efendi b. Mustafa, İbrahim Efendi b. Abdülgaffar, fahrü’l-akrân Yalnızkürk’ün dâmadı Hüseyin Ağa, fahrü’l-kuzât Mustafa Efendi nâib-i racül, İsmail Çelebi b. Mehmed.