İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 397 Hüküm no: 295 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum Patriği Diyonyos v. Paraki v. Yanaki’nin İbrahim Ağa b. Ali b. Ahmed’de olan borcunun kefaletinden dolayı Patrik Kalnikos’dan tahsil olunduğu Mahmiye-i İstanbul’da Çerâğī Hamza mahallesinde sâkin iken bundan akdem vefât eden İbrahim Ağa b. Ali b. Ahmed’in verâseti zevce-i metrûkesi Ayşe bt. Abdullah nâm hatun ile babası mezbûr Ali’nin li-ebeveyn karındaşı olmağla min-ciheti’l-usûbeti’n-nesebiye Hüseyin Ağa b. Ahmed nâm kimesneye münhasıra olduğu şer‘an zâhir ve müte‘ayyen oldukdan sonra mezbûr Hüseyin Ağa meclis-i şer‘-i şerîf-i enverde ve mahfel-i dîn-i münîf-i ezherde hâlâ Rum patriki olan işbu râfi‘ü’l-kitâb Kalinkos v. Rafael muvâcehesinde ikrâr-ı tâm ve takrîr-i kelâm edip mûrisim müteveffâ-yı mezbûr İbrahim Ağa hâl-i hayatında kendi malından bin seksen üç senesi Muharremi’l-haramı gurresinde Rum patriki olan Diyonyos v. Paraki v. Yanaki’ye üç bin altı yüz guruş idâne ve teslîm ol dahi ba‘de’l-istidâne ve’l-kabz deyn-i mezbûru nâtık ve hatt u hatmini hâvî işbu [bir] kıt‘a temessükü mezbûr İbrahim Ağa’ya ba‘de’t-teslîm deyn-i mezbûrun iki bin beş yüz guruşunu mezbûr İbrahim Ağa’ya edâ ve teslîm ol dahi ahz u kabz edip deyn-i mezbûrdan bin yüz guruş bâkī kaldıkdan sonra yine mezbûr İbrahim Ağa bin seksen dört senesinde dahi kendi malından merkūm Diyonyos’a bir def‘a dahi altı bin dokuz yüz guruşunu ber-vech-i muharrer idâne ve teslîm ol dahi ba‘de’l-istidâne ve’l-kabz kezâlik hatt u hatmini hâvî ve deyn-i sânî merkūmu nâtık işbu temessükü verip ba‘dehû meblağ-ı mezbûr altı bin dokuz yüz guruşun dahi bin yedi yüz doksan yedi guruşunu yine mezbûr İbrahim Ağa’ya edâ ve teslîm etmekle temessük-i sânî merkūmda tahrîr olunan deyn-i mezbûrdan beş bin yüz üç guruş bâkī kalıp ve bin seksen yedi senesi Şa‘bâni’l-muazzamı’nda yine mezbûr İbrahim Ağa malından bir def‘a dahi dört bin beş yüz guruşunu merkūm Diyonyos’a edâ ve teslîm ol dahi istidâne ve kabz ve işbu temessükü verip yine mezbûr İbrahim Ağa hâl-i hayatında bin seksen altı senesi Cemaziyelûlâsı’nda Patrik olan Partinyos v. Yanaki v. Yorgi’ye kendi malından bin sekiz yüz yirmi beş guruşunu idâne ve teslîm ol dahi istidâne ve kabz ve hatt u hatmini hâvî işbu temessükü verdikden sonra evvelâ zikrolunan medyûn-ı merkūm Diyonyos zimmetinde üç kıt‘a temessük nâtık olduğu üzere idâne eylediği cem‘an on beş bin guruşdan vech-i muharrer üzere makbûzu olan dört bin iki yüz doksan yedi guruşdan bâkī on bin yedi yüz üç guruş ve mezbûr Partinyos idâne eylediği bin sekiz yüz yirmi beş guruş ki min-haysü’l-mecmû‘ on iki bin beş yüz yirmi sekiz guruşu kable’l-ahz mezbûr İbrahim Ağa fevt olup meblağ-ı bâkī mezbûr bi’l-irsi’ş-şer‘î benimle zevcesi mezbûre Ayşe Hatun’a isâbet etdikden sonra bin doksan beş senesinde mahmiye-i mezbûrede Fener kapısı kurbünde Kürkçü Manolaki nâm zimmî menzilinde mezbûrân ile hesap gödüğümüzde mezbûr Diyonyos ber-vech-i muharrer teslîmâtından mâ‘adâ cihet-i karz-ı şer‘îden meblağ-ı mezbûr on bin yedi yüz üç guruşu merkūm Partinyos kezâlik cihet-i karz-ı şer‘îden bin sekiz yüz yirmi beş guruş müteveffâ-yı mezbûr İbrahim Ağa’ya zimmetlerinde edâsı lâzım deynleri olduğunu ruûsi’l-işhâd ikrâr ve i‘tirâf eyleyip meblağayn-i mezbûreyn cem‘an on iki bin beş yüz yirmi sekiz guruş işbu mezbûr Kalnikos emir ve kabûlü hâviye kefâlet-i sahîha-i şer‘iyye ile kefîl bi’l-mâl olmağla meblağ-ı mezbûr on iki bin beş yüz yirmi sekiz guruşu bundan akdem dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i âlîde ben ve mezbûr Ayşe Hatun’un vekîl-i şer‘îsi olan Hasan Ağa b. Mehmed bi hükmi’l-kefâleti’l-mezkûre Patrik-i merkūm Kalnikos’dan ba‘de’d-da‘vâ müdde‘âmızı Mustafa Ağa b. Ali ve Şaban Ağa b. Ahmed şehâdetleriyle mezbûrun muvâcehesinde şer‘an isbât etmekle meblağ-ı mezbûrun bize edâsına hükm-i hâkimü’ş-şer‘ lâhık olmuşidi el-hâletü hâzihî beynimize muslihûn tavassut edip meblağ-ı mahkûmin bih mezbûr on iki bin beş yüz yirmi sekiz guruşda benim selâse-i erba‘ hisseme isâbet eden dokuz bin üç yüz doksan altı guruş da‘vâsından Patrik-i mezbûr Kalnikos ile üç bin guruş üzere beynimizde akd ve musâlaha olundukda ben dahi sulh-i mezbûru kabûl ve bedel-i sulh olan meblağ-ı mezbûr üç bin guruşu mezbûr Kalnikos yedinden ahz u kabz edip mâ‘adâsı olan altı bin üç yüz doksan altı guruşa ve mûrisim müteveffâ-yı mezbûr ile ile’l-vefât ve benimle târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâ ve muhâsemât ve eymân ve mütâlebâtdan mezbûr Kalnikos’un ve medyûn-ı mezbûrân ile kefîlleri olan sâir metrepolidlerin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min-ba‘d mezbûrûn ile vechen mine’l-vücûh ve sebeben mine’l-esbâb da‘vâ ve nizâ‘ım kalmadı dedikde mukırr-ı mezbûr Hüseyin Ağa’nın ber-vech-i muharrer cârî ve sâdır olan cemî‘-i kelimâtını el-mukarrun lehu’l-mezbûr Kalnikos vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî aşar min-Şevvali’l-mükerrem li-sene seb‘a ve mie ve elf. [94b] Şuhûdü’l-hâl: Mehmed Çavuş b. Abdurrahman Efendi, eş-Şeyh İslâm Efendi b. Mehmed, Mehmed Efendi b. Mehmed el-imâm, Musa b. Mehmed, Şaban Ağa b. Ahmed, Mehmed Efendi b. Mustafa, Nasuh Efendi b. Mehmed, İbrahim Çelebi b. Zülfikar, Ömer Efendi b. Abdüsselam, Derviş Çelebi b. İvaz, Mehmed b. Şaban, Süleyman Efendi b. Abdullah el-imâm, Hüseyin Çelebi b. Hasan el-müezzin, İsmail Çelebi b. Mehmed, Hasan Efendi b. Osman, Mustafa Ağa b. Ali, el-Hâc Süleyman b. Receb, Ahmed Çelebi b. Hüseyin, Receb b. Mehmed, Hüseyin b. Mehmed, ve gayruhum mine’l-huzzâr.