İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 399 Hüküm no: 296 Orijinal metin no: [94b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum Patriği Kalnikos v. Rafael’in Köse İbrahim Ağa b. Ali Vakfı’nın mütevellisi Hasan Çelebi’den aldığı borca isimleri belirtilen metrepolidlerin kefil oldukları Mahmiye-i İstanbul’da hâlâ Rum patriki olan Kalnikos v. Rafael meclis-i şer‘-i şerîf-i enverde mahmiye-i mezbûrede Çerâğī Hamza mahallesinde vâki‘ merhûm Köse İbrahim Ağa b. Ali Vakfı’na bi’l-fi‘l mütevellî olan işbu râfi‘ü’l-kitâb Hasan Çelebi b. Mehmed nâm kimesne mahzarında ikrâr-ı tâm ve takrîr-i kelâm edip merhûm-ı mezbûr Köse İbrahim Ağa’nın ammi ve vârisi olan işbu hazır bi’l-meclis Hüseyin Ağa b. Ahmed ile beynimizde ma‘lûm bedel-i sulhdan zimmetimde üç bin guruş deynim olup bir vechile hâlâ edâya iktidârım olmamağla deyn-i mezbûru edâ içün âhardan istidâne iktizâ etmekle mütevelli-i mezbûr Hasan Çelebi yedinden asl-ı mal-ı vakf-ı mezbûrdan üç bin guruşu istidâne ve kabz edip asl-ı mal-ı vakf-ı mezbûr üç bin guruşu ve semeni târih-i kitâbdan bir sene tamamına değin mü’eccel ve mev‘ûd, levn ve zirâ‘ı beynimizde ma‘lûm mütevellî-i merkūm yedinden müşterâ ve makbûz çuka bahâsından dahi üç yüz guruş ki cem‘an üç bin üç yüz guruş taraf-ı vakf-ı mezbûra zimmetimde mü’eccel ve mev‘ûd ve edâsı lâzım deynimdir dedikde gıbbe’t-tasdîkı’ş-şer‘î ve’t-tahkīki’l-mer‘î hâlâ Manisa Metrepolidi olan Tovfan ve Ereğli Metrepolidi olan Novfitos ve Kapıdağı Metrepolidi Kiryoloz ve İznikmid Metrepolidi olan Pertanyos ve Kadıköyü Metrepolidi olan Gavril ve Bursa Metrepolidi olan Kiryolozor ve Rodos Metrepolidi Kostantin ve Sakız Metrepolidi Grigoryoz ve Midilli Metrepolidi olan Kostantiyoz ve Terkos Metrepolidi olan Nikodimos nâm ruhbân kendi taraflarından asıl ve Kayseriye Metrepolidi olan Karyanos ve Edirne Metrepolidi olan Atanşiyoz ve Filibe Metrepolidi olan Tavaftiyos ve Selanik Metrepolidi olan Ağnadiyos ve İznik Metrepolidi olan Mayatyos ve Siroz Metrepolidi olan Antimus ve Yenişehir Metrepolidi olan Pertinyos ve Yanya Metrepolidi olan Kayyim ve Narda Metrepolidi olan Malatiyos ve Girid Metrepolidi olan Atanyos ve Molova Metrepolidi olan Antimus ve İzmir Metrepolidi olan Grigoryos ve Silistre Metrepolidi olan Atansiyos ve Ahyolu Metrepolidi olan Danil ve Sofya Metrepolidi olan Grigoryos ve Tırnovi Metrepolidi olan Teodoşiyos ve Misivri Metrepolidi olan Hırsikıryos ve Edirne Metrepolidi olan Londaryos ve Dimetoka Metrepolidi olan İjmiye ve Jeyze Metrepolidi olan Palatiyoz ve Vize Metrepolidi olan Zaharya nâm ruhbân taraflarından husûs-ı âti’z-zikre ikrâra sâbitü’l-vekâle vekîlleri olmağla vekâleten meclis-i şer‘de mütevellî-i mezbûr Hasan Çelebi mahzarında her biri asâleten ve vekâleten ikrâr ve takrîr-i kelâm edip patrik-i mezbûrun taraf-ı vakf-ı mezbûra ber-vech-i muharrer zimmetinde edâsı lâzım deyni olan meblağ-ı mezbûr üç bin üç yüz guruşa biz müvekkilûn-ı mezbûrûndan her birimiz alâ haddetin emir ve kabûlü hâviye kefâlet-i sahîha-i şer‘iyye ile kefîl ve zâmin olduk dediklerinde gıbbe’t-tasdîkı’l-mu‘teberi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’l-hâmis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Arzuhâlci Mustafa Çavuş, eş-Şeyh İslâm Efendi, Mehmed Efendi b. Mehmed, Musa Çelebi b. Mehmed, Şaban Ağa b. Ahmed, Mehmed Efendi b. Mustafa, Nasuh Efendi b. Mehmed, İbrahim Çelebi b. Zülfikar, Ömer Efendi b. Abdüsselam, Derviş Çelebi b. İvaz, Mehmed b. Şaban, Süleyman Efendi b. Abdullah el-imâm, Hüseyin Çelebi b. Hasan el-müezzin, İsmail Çelebi b. Mehmed, Hasan Efendi b. Osman, Mustafa Ağa b. Ali, el-Hâc Süleyman b. Receb, Ahmed Çelebi b. Hüseyin, Receb b. Mehmed, Hüseyin b. Mehmed , İbrahim b. Mehmed.