İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 400 Hüküm no: 297 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hatun’un Kapıemini Mustafa Çavuş ve Ahmed Çelebi vakıflarından aldığı borca karşılık rehin bıraktığı evin bir kısmını satması Mahmiye-i İstanbul’da Çerâğī Hasan mahallesi sâkinelerinden olup zâtını ma‘rifet-i şer‘iyye ile ârifân Zülfikar Ağa b. Abdullah ve Mehmed Ağa b. Mustafa ta‘rîfleriyle mu‘arrefe olan Râbia Hatun bt. Ahmed Ağa meclis-i şer‘-i şerîfde tüccâr tâifesinden işbu sahibü’l-vesîka Haçador v. Ağya ve Fati v. Kaba nâm zimmîler muvâcehelerinde ikrâr-ı tâm ve takrîr-i kelâm edip silk-i mülkünde münselik olup mahalle-i mezbûrda vâki‘ bir tarafdan âhar mülküm ve bir tarafdan Mataracı Ahmed Ağa mülkü ve iki tarafdan tarîk-i âm ile mahdûd hâricen ve dâhilen büyût-ı adîdeyi ve bahçeyi müştemil mülk menzilimi merhûmân Kapıemini Mustafa Çavuş ve Ahmed Çelebi vakıflarının asl-ı mâllarından mukaddemâ istidâne ve kabz eylediğim yedi yüz guruş mukābelesinde hâlâ bi tarîkı’l-istiğlâl rehin olup lâkin asl-ı mal-ı mezbûr yedi yüz guruş ile menzil-i mezbûrun ücret-i ma‘lûmesini edâya bir vechile iktidârım olmamağla menzil-i mezbûrun bir mikdârı âhara bey‘ ve semeni ile deyn-i merkūm edâ olunmak vakfeyn-i merkūmeyn haklarında her vecihle evlâ ve enfa‘ olmağla ben dahi menzil-i mahdûd-ı mezbûrun ancak dâhiliyesinin ebniyesini kendileri hedm ve kabz etmek üzere vakfeyn-i mezbûreynin hâlâ mütevellîleri olan işbu Mehmed Ağa b. Mustafa’nın izin ve ma‘rifeti ile mezbûran Haçador ve Fati’ye bin yüz yetmiş guruşa bey‘ u teslîm onlar dahi iştirâ ve tesellüm ve ber-vech-i muharrer hedm ve âhara bey‘i ta‘ahhüd eyleyip ancak menzil-i mahdûd-ı mezkûrun dâhiliyesinin ebniyesi mülk-i müşterâsı olup semen-i mezbûrun yüz yetmiş guruşun yüz elli guruşunu peşîn yedinden ahz u kabz edip mâ‘adâsı olan bin yirmi guruşun üç yüz elli guruşunu târih-i kitâb senesi Zilhiccesi gurresine değin tecîl ve bâkī altı yüz yetmiş guruşdan her otuz gün tamamında bana ellişer guruş verip gurre-i mezbûreden dört yüz iki gün tamamına değin bi’t-taleb tecîl ve taksît eylediğimde ol dahi kabûl ve ber-vech-i muharrer mukassat edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 5 Zilkâde sene [1]107 Şuhûdü’l-hâl: Zülfikar Ali Ağa b. Abdullah, Mehmed Ağa b. Mustafa, Mustafa Ağa b. Mehmed, Abdullah b. Abdurrahman, Ahmed Efendi b. Mehmed, İbrahim Efendi b. Mehmed, Mâlcızâde Abdurrahman, Hamza Çelebi b. el-Hâc Mehmed, İbrahim Çelebi el-câbî, Mehmed Çelebi b. Mustafa.