İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 401 Hüküm no: 298 Orijinal metin no: [95a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Davud Vakfı’na aid olup düşük fiyatla kirada bulunan mahzenin kira bedelinin arttırılması Mahmiye-i İstanbul hısnı ebvâbından Ayazma kapısı hâricinde vâki‘ merhûm el-Hâc Davud Vakfı’na bi’l-fi‘l mütevellî olan el-Hâc Hüseyin Çelebi b. Sinan nâm kimesne meclis-i şer‘-i şerîf-i enverde takrîr-i kelâm ve ta‘bîr ani’l-merâm edip zikrolunan Ayazma kapısı hâricinde vâki‘ lede’l-ahâlî ve’l-cîrân ma‘lûmü’l-hudûd bir bâb mahzen vakf-ı mezbûrdan icâre-i mu‘accele ve beher mah altmış akçe ücret-i mü’eccele ile Osman b. Ebûbekir nâm kimesnenin taht-ı tasarrufunda iken merkūm Osman bilâ-veled fevt olup mahzen-i mezbûr taraf-ı vakf-ı mezkûra âid olmağla işbu bin yüz yedi senesi Cemaziyelûlâsı’nda vakf-ı mezbûra mütevellî olan Mehmed b. Hüseyin nâm kimesne zikrolunan mahzenin hîn-i icârda icâre-i mu‘accele-i misliyesi on beş bin beş yüz sağ akçe iken nâzır-ı vakf olan Kömürcü Halil ma‘rifetiyle zikrolunan mahzeni icâre-i mu‘accele-i misliyesinden noksan-ı fâhiş olan dört bin yüz yirmi akçeye hâlâ diyâr-ı âharda olan Mehmed Reis nâm kimesneye bi’t-tevliye îcâr ve teslîm etmekle meblağ-ı mezbûr dört bin yüz yirmi akçe mahzen-i mezbûrun ber-vech-i muharrer icâre-i mu‘accele-i misliyesinden noksan-ı fâhiş olmağla vakf-ı mezbûra gadr ve zarar olup ve ecr-i mislini tekmîl içün müste’cir-i mezbûr diyâr-ı âharda bulunup vakf-ı mezbûrun zarûreti dahi olmağla zikrolunan mahzeni sûk-ı sultânîde müzâyede ve nidâ etdirip ragabât-ı nâs munkatı‘a oldukda ol dahi ecr-i misli ile âhara îcâra kıbel-i şer‘den bana izin verilmek matlûbumdur dedikde kazıyye mütevelli-i mezbûrun takrîr-i meşrûhu üzere olup mahzen-i mezbûru mütevellî-i sâbık mezkûr Mehmed icâre-i mu‘accele-i misliyesinden noksan-ı fâhiş ile îcâr edip vakf-ı mezbûra gadr ve zarar olduğunu mürtezika-i vakf ve zeyl-i kitâbda muharrerü’l-esâmî olan Müslimîn ihbâr etmeleriyle mütevellî-i mezbûrun îcâr-ı merkūmu şer‘an sahîh ve mu‘teber olmamağla mahzen-i mezbûru sûk-ı sultânîde nidâ ve müzâyede etdirip ragabât-ı nas munkatı‘a oldukda ecr-i misli ile âhara îcâra mütevellî-i mezbûr el-Hâc Hüseyin’e kıbel-i şer‘den ba‘de’l-izn mâ hüve’l-vâki‘ bi’t-taleb ketb olundu. Fî 5 Şevval sene [1]107 Şuhûdü’l-hâl: Abdullah Efendi el-imâm, Halil Efendi b. ( ), Hacı Mustafa imâm-ı Hoca Halil Attar, İsmail Efendi b. Mustafa nâzır, Abdurrahman Efendi halîfe-i muhâsebe.