İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 402 Hüküm no: 299 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Görevli olarak Akdeniz tarafına gönderilen Abdullah Kapudan’ın gerekli olan alet ve edevatı teslim aldığı Husûs-ı âti’z-zikrin mahâllinde ketb ve tahrîri içün sâdır olan fermân-ı şerîfe imtisâlen savb-ı şer‘den irsâl olunan İbrahim Efendi b. Mehmed el-Hamîdî Tersâne-i âmire’de vâki‘ kapudanpaşalara mahsûs yalı ta‘bîr olunur dîvânhâneye varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî olundukda yedek ta‘bîr olunur sefînenin kapudanı olan fahrü’l-eşbâh Abdullah Kapudan b. el-merhûm Cafer Kapudan meclis-i ma‘kūd-ı mezbûrda hâlâ Tersâne-i ma‘mûre emîni olan umdetü’l-emâcid ve’l-ekârim câmi‘u’l-mehâmid ve’l-mekârim Yusuf Efendi b. Mustafa mahzarında ikrâr-ı tâm ve takrîr-i kelâm edip hâlâ ben işbu sene-i mübârekede sefîne-i mezbûre ile Akdeniz tarafına memûr olmağla mûmâ-ileyh Yusuf Efendi’nin yedine verdiğim mümzâ ve mahtûm mahzen defteri mûcebince müceddeden binâ olunan sefîne-i mezbûrenin top ve lenger ve esbâb-ı âhen ve bâd ü bân ve resen ve seren ve kürek ve tente ve tentelete ve direk ve bi’l-cümle lâzım olan cemî‘-i âlâtımızı mûmâ-ileyh Yusuf Efendi yedinden bi’t-tamam ahz u kabz eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr İbrahim Efendi mahâllinde ketb ve tahrîr ba‘dehû ma‘an irsâl olunan İbrahim b. Mehmed ve Ali [b.] Mehmed ile meclis-i şer‘a gelip alâ vukū‘ıhî inhâ ve takrîr etmeğin mâ hüve’l-vâki‘ bi’t-taleb ketb olundu. Fî 8 min-Zilkâ‘deti’ş-şerîfe li-sene seb‘a ve mie ve elf. Şuhûdü’l-hâl: el-Hâc Hasan Ağa b. ( ), Yalnızkürk dâmadı Hüseyin Ağa, Süleyman Ağa b. Mustafa, Ahmed b. Ahmed, Ebûbekir Efendi, İbrahim Efendi b. Ahmed, Halil Ağa b. Abdurrahman Ağa.