İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 402 Hüküm no: 300 Orijinal metin no: [95b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Mustafa b. Sinan’ın evini Derviş Ağa’ya sattığı Husûs-ı âti’z-zikrin mahâllinde ketb ve tahrîri içün savb-ı şer‘[den] bi’t-taleb irsâl olunan Ebûbekir Efendi b. el-Hâc Abdülkerim mahmiye-i İstanbul’da Mimar Kemâl mahallesinde sâkin tüccârdan umdetü’l-eşbâh ve’l-a‘yân el-Hâc Derviş Ağa b. Abdurrahman’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahalle-i mezbûre sükkânından Mehmed Ağa b. Mustafa b. el-Hâc Sinan tarafından husûs-ı âti’z-zikre vekîl olduğu mahalle-i mezbûre sükkânından Mehmed Efendi b. el-Hâc Mustafa ve Mustafa Efendi b. Derviş şehâdetleriyle sâbit olan akrabâsından İsmail Ağa b. Ali Ağa meclis-i ma‘kūd-ı mezbûrda işbu râfi‘ü’l-kitâb mûmâ-ileyh el-Hâc Derviş Ağa mahzarında bi’l-vekâle ikrâr-ı tâm ve takrîr-i kelâm edip müvekkilim merkūm Mehmed Ağa silk-i mülkünde münselik olup mahalle-i mezbûrda vâki‘ bir tarafdan mûmâ-ileyh el-Hâc Derviş Ağa mülkü ve bir tarafdan Sarı Mehmed ve Hâce Sâliha Hatun tasarruflarında olan vakıf menziller ve bir tarafdan merhûm Yalnızkürk ( ) Ağa veresesi tasarruflarında olan menzil ve bir tarafdan ba‘zen el-Hâc Mustafa mülkü ve ba‘zen müvekkilim mezbûr Mehmed Ağa’nın mülkü olan sagīr bahçe ile mahdûd zât-ı eşcâr-ı müsmire ve gayr-ı müsmire ve bir kıt‘a bi’r-i mâyı müştemil mülk hadîkasını bi cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mûmâ-ileyh el-Hâc Derviş Ağa’ya altı yüz elli guruş ile hîn-i akidde aynı müzî‘a-i mechûlü’l-aded bir kabza fülûsa bey‘ ve temlîk ve teslîm ol dahi ber-vech-i muharrer iştirâ ve kabûl ve temellük ve tesellüm eyledikden sonra semen-i mezbûrun yüz elli guruşunu hüccet-i karz-ı şer‘îden mûmâ-ileyh el-Hâc Derviş Ağa’ya zimmetinde edâsı lâzım deyni olan yüz elli guruşa takas ol dahi mukāssa ve kabûl edip mâ‘adâsı olan beş yüz guruşu yedinden tamamen ahz u kabz ve tesellüm eyledi fî-mâ ba‘d hadîka-i mezbûre mûmâ-ileyh el-Hâc Derviş Ağa’nın mülk-i müşterâsı olmuşdur müvekkilim mezbûr Mehmed Ağa’nın vechen mine’l-vücûh ve sebeben mine’l-esbâb alâka ve medhali kalmadı keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr Ebûbekir Efendi mahâllinde ketb ve tahrîr edip ba‘dehû ma‘an ba‘s olunan Mehmed b. Ahmed ve Ali b. Mehmed ile meclis-i şer‘a gelip alâ vukū‘ıhî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min-Zilkâ‘deti’ş-şerîfe li-sene seb‘a ve mie ve elf. Şuhûdü’l-hâl: Umdetü’l-müderrisîni’l-kirâm zübdetü’l-muhakkıkīni’l-fihâm Mustafa Efendi müfettiş-i sâbık, Mehmed Efendi b. el-Hâc Mustafa, Mustafa Efendi b. Derviş, Mehmed Sûfî el-müezzin, Çito Yusuf Bey, Mehmed Çelebi Ahmed b. ( ).