İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 403 Hüküm no: 301 Orijinal metin no: [95b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’dan alacaklı olduğunu iddia eden sâbık Tersane-i âmire kethudası Mustafa Ağa b. Ali’nin davasını ispat edemediği Mahrûse-i Galata’da Azebkapısı kurbünde sâkin sâbıkā Tersâne-i âmire kethudâsı olan Mustafa Ağa b. Ali dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde kapudan-ı sâbık vezîr-i mükerrem sa‘âdetlü Yusuf Paşa hazretlerinin kethudâları olan işbu râfi‘ü’l-kitâb Osman Ağa b. Hüseyin mahzarında üzerine da‘vâ ve takrîr-i kelâm edip müşârun-ileyh Yusuf Paşa kapudan ve ben tersâne kethudâsı iken paşa-yı müşârun-ileyhe verdiğim elli yedi bin akçeye ve mezbûr Osman Ağa’nın defteri [96a] mûcebince paşa-yı müşârun-ileyhin etbâ‘ından on iki nefer kimesneye medfû‘um olan üç yüz guruş kıymetli levn ve zirâ‘ı beynimizde ma‘lûm çuka ve kumaşa müte‘allik mezbûr Osman Ağa ile da‘vâ ve nizâ‘ım kalmayıp meblağayn-i mezbûreynden mâ‘adâ mezbûr Osman Ağa beni Tersâne kethudâlığından azl etdirmemek içün bi gayr-ı hakkın üç yüz guruşumu ahz u kabz ve kendi mesârifine sarfla istihlâk etmişidi hâlâ meblağ-ı merkūm üç yüz guruşu bi tarîkı’d-damân mezkûr Osman Ağa’dan taleb eylediğimde bana teslîmden imtinâ‘ eder hâlâ suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbıka beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ üç yüz guruşu bi gayr-ı hakkın ahz u kabz ve kendi mesârifine sarfla istihlâk etmeyip ol vechile meblağ-ı mezbûr üç yüz guruşun bi tarîkı’d-damân müdde‘î-i mezbûra red ve teslîmi üzerine lâzım gelmediğine mezbûr Osman Ağa’ya yemîn teklîf olundukda ol dahi hasbe’l-mesûl alâ vefki’l-mesûl yemîn billâhi te‘âlâ etmeğin mûcebiyle müdde‘î-i mezbûr Mustafa Ağa bilâ-beyyine bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâmin min-Zilkâ‘deti’ş-şerîfe li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, umdetü’l-eşbâh ve’l-a‘yân Mehmed Ağa ser-çavuşân, fahrü’l-akrân ve’l-ekfâ Muhzır Mehmed Ağa, İbrahim Çavuş emîn-i çavûşân, el-Hâc Mehmed Çavuş b. Abdullah, Mehmed Çelebi b. Hüseyin, İbrahim Çavuş b. Ahmed, Mustafa Efendi nâib-i racül, Receb Efendi nâib-i kapan.