İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 404 Hüküm no: 302 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Efendi b. Ahmed’in eski ortağı İbrahim Çelebi’den alacağını tahsil ettiği Mahmiye-i İstanbul’da Karabaş mahallesi sükkânından Osman Efendi b. el-Hâc Ahmed meclis-i şer‘-i şerîf-i enverde İbrahim Çelebi b. Ahmed nâm kimesne mahzarında ikrâr-ı tâm ve takrîr-i kelâm edip mezbûr İbrahim Çelebi ile mukaddemâ keçecilik san‘atında şerîkler olmağla fesh-i akd-i şirket edip beynimizde hesap gördüğümüzde aslü’l-mâl ve fâideden mezbûr İbrahim Çelebi zimmetinde iki yüz kırk guruş hakkım zuhûr etmekle meblağ-ı mezbûrun on beş guruşunu yedinden ahz u kabz edip mâ‘adâsı olan iki yüz yirmi beş guruşa zevcesi Hatice Hatun kefâlet-i sahîha ile kefîl oldukdan sonra meblağ-ı mezbûrun elli beş guruşunu dahi ahz u kabz edip yüz yetmiş guruş hakkım bâkī kalmışidi hâlâ meblağ-ı bâkī mezbûr yüz yetmiş guruşu taleb eylediğimde hâlen bana edâya iktidârı olmayıp tecîle tâlib olmağla ben dahi târih-i kitâbdan elli bir gün tamamına değin tecîl edip ol dahi kabûl eyledi fî-mâ ba‘d mezbûre Hatice Hatun’u kefâlet-i mezbûreden ihrâc edip meblağ-ı mü’eccel-i mezbûrdan mâ‘adâ müdde‘âm olan bir def‘a yüz elli guruş ve bir def‘a yüz yirmi guruş ve bi’l-cümle târih-i kitâba gelince beynimizde cereyân eden sâir ahz u i‘tâya müte‘allika âmme-i da‘vâdan ben mezbûr İbrahim Çelebi ile zevcesi mezbûre Hatice Hatun’un zimmetlerini ol dahi benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledik min-ba‘d meblağ-ı mü’eccel-i mezbûrdan mâ‘adâ birbirimiz ile da‘vâ ve nizâ‘ımız kalmadı dediklerinde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min-Zilkâ‘deti’ş-şerîfe li-sene seb‘a ve mie ve elf. Şuhûdü’l-hâl: İbrahim Efendi b. Rasûl el-imâm, el-Hâc Sefer b. Ömer keçeci, Ali Çelebi b. Ahmed Efendi, el-Hâc Yusuf b. el-Hâc Mehmed, İsmail Çelebi b. Mustafa.