İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 405 Hüküm no: 303 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey b. Hasan Paşa’nın Yahudi taifesinden Abraham v. Şinasi’deki alacağını tahsil ettiği Mahmiye-i İstanbul’da Ayasofya-i kebîr mahallesinde sâkin İbrahim Bey b. el-merhûm Hasan Paşa meclis-i şer‘-i şerîf-i enverde mahmiye-i mezbûrede Ayazma kapısı kurbünde sâkin işbu bâ‘isü’l-vesîka Abraham v. Şinasi nâm Yahûdî muvâcehesinde ikrâr-ı tâm ve takrîr-i kelâm edip mezbûr İbrahim bundan akdem cihet-i karz-ı şer‘îden beş yüz guruş zimmetinde hakkım olup meblağ-ı mezbûrun üç yüz guruşunu bi’d-defa‘ât nukūd-ı ma‘lûmü’l-mikdâr saman kıymeti olmak üzere yedinden ahz u kabz edip iki yüz guruş hakkım bakī kalmışidi deyü benden taleb ve da‘vâ eyledikde ben dahi meblağ-ı bâkī-i mezbûr iki yüz guruş mukābelesinde bin beş yüz kantar saman dahi sana def‘ u teslîm edip meblağ-ı mezbûrdan zimmetim berî olmuşdur deyü def‘le mukābele eylediğimde beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip mezbûr Abraham da‘vâ-yı mezbûresinden benimle elli guruş üzerine inşâ-i akd-i sulh eylediklerinde ol dahi sulh-ı mezbûru kabûl ve mâ‘adâsına ve târih-i kitâba gelince sâir hukūka müte‘allika âmme-i da‘vâdan benim zimmetimi ibrâ-i âmm-ı kātı‘u’n-nizâ‘la ibrâ ve ıskāt edip lâkin bedel-i sulh-ı mezbûr elli guruşu hâlen edâya iktidârı olmayıp tecîle tâlib olduğumda ol dahi târih-i kitâbdan bir sene tamamına değin tecîl etmekle ben dahi kabûl eyledim meblağ-ı mezbûr elli guruş ber-vech-i muharrer mezkûr Abraham zimmetinde mü’eccel ve mev‘ûd deynim olup meblağ- merkūmdan mâ‘adâ benim dahi [96b] mezbûr Abraham ile vechen mine’l-vücûh da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min-Zilkâ‘deti’ş-şerîfe li-sene seb‘a ve mie ve elf. Şuhûdü’l-hâl: Mehmed Efendi b. Mustafa, Yanyalı Hasan Çavuş b. ( ), İbrahim Çavuş b. Mustafa, Ahmed Çelebi b. Mehmed, İbrahim Ağa b. Hasan, Molla Mehmed b. Nebi, İbrahim Çelebi b. Ahmed, Mustafa b. Şaban, Ali b. Bali ve gayruhum mine’l-huzzâr.