İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 406 Hüküm no: 304 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tımar bedeli toplamakla görevli Mahmud Ağa b. Bekir’in kiraladığı araziyi fare istila ettiği için gelir elde edemeyen Ayşe Hatun ve kefili Yusuf b. Zeynelabidin ile anlaştığı Mahmiye-i İstanbul’da Kepenekçi Sinan mahallesi sükkânından olup bin yüz altı senesinde mensûhât kaleminde olan tımarların bedellerini cem‘a memûr olan Mahmud Ağa b. Bekir nâm kimesne meclis-i şer‘-i şerîf-i enverde mahmiye-i mezbûrede Atpazarı kurbünde sâkin Ahmed b. Ali nâm sagīrin ceddesi ve vasîyy-i şer‘îsi olan Ayşe Hatun bt. Abdullah mahzarında ikrâr-ı tâm ve takrîr-i kelâm edip vilâyet-i Anadolu’da Biga kazâsına tâbi‘ Ahî nâm karye ve gayriden Abdullah tımarı demekle ma‘rûf tımarı sene-i mezbûreye mahsûb olmak üzere zabt ve hâmil olan mahsûlâtını kabz etmek üzere sagīr-i mezbûr ahz içün merkūme Ayşe Hatun benden elli guruşa iltizâm ve kabûl ve hatt u hatmini hâvî yedimden bir kıt‘a temessük verip işbu hazır bi’l-meclis Yusuf b. Zeynelabidin nâm kimesne kefîl olmuşidi lâkin târih-i mezbûrda tımar-ı mezbûr arâzisine fâre müstevlî olup mahsûlatına noksan-ı küllî terettüp etmekle mezbûre Ayşe Hatun tımar-ı mezbûra kat‘â vaz‘-ı yed etmeyip mahsûlatından bir nesne kabz etmemekle temessük-i merkūmu benden taleb ve da‘vâ etmekle ben dahi mârrü’z-zikr temessükü zâyi‘ ve istihlâk eyledim bulunursa kat‘â amel olunmasın ba‘de’l-yevm târih-i mezbûra mahsûben tımar-ı mezbûr mahsûlâtına ve bedeline müte‘allika mezbûre Ayşe Hatun ve kefîli merkūm Yusuf ile vechen mine’l-vücûh ve sebeben mine’l-esbâb da‘vâ ve nizâ‘ım ve husûmetim kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 26 Şevval sene [1]107 Şuhûdü’l-hâl: Mehmed Efendi b. el-Hâc Mustafa, Hüseyin b. İsmail, İbrahim Çelebi b. Ahmed, Mehmed b. Şaban.