İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 408 Hüküm no: 306 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. İbrahim Ağa’nın Mustafa Ağa’dan alacaklı olduğunu ispatlayamadığı Mahmiye-i İstanbul’da Dizdâriye mahallesinde sâkin Çorlulu Hüseyin Ağa b. İbrahim nâm kimesne dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde mukaddemâ rikâb-ı hümâyûnda sadâret-i uzmâ ve vekâlet-i kübrâ kāimmakāmı iken vedâ‘-ı âlem-i fânî eden merhûm Osman Paşa’nın hayatında kethudâsı olan işbu râfi‘ü’l-kitâb Mustafa Ağa b. Hüseyin mahzarında takrîr ve da‘vâ ve tasvîr-i müdde‘â edip hâlâ Cidde vâlîsi olan düstûr-ı mükerrem sa‘âdetlü Mustafa Paşa hazretlerinin yüz beş senesinde sadrazam iken merhûm-ı mûmâ-ileyh Osman Paşa kethudâsı olmağla gāib ani’l-meclis Beşli Ağası Ahmed Ağa’nın kasaba-i İsmail’den vezîr-i müşârun-ileyhin matbahına irsâl eylediği üç bin yüz seksen vakıyye revgan-ı sâdenin semenine mahsûb olmak üzere bin iki yüz guruşu mûmâ-ileyh Osman Paşa’nın emriyle ben kendi malımdan mezbûr Beşli Ağa’sı Ahmed Ağa’ya def‘ u teslîm eylediğimden sonra gelip meblağ-ı mezbûru mûmâ-ileyh Osman Paşa’dan taleb eylediğimde kethudâm Mustafa Ağa’dan ahz u kabz eyleye deyü bana emir eyledikden sonra meblağ-ı mezbûrdan altı yüz seksen guruşunu vezîr-i müşârun-ileyhin sarf kâtibi İbrahim Efendi yedinden ahz u kabz edip beş yüz yirmi guruşu dahi mûmâ-ileyh Osman Paşa’nın emrettiğine binâ’en mezbûr Mustafa Ağa’dan taleb ederim suâl olunsun dedikde müdde‘î-i mezbûrun takrîr-i meşrûhu üzere deyn-i mezbûra kefâlet veyâ havâleyi mutazammın ve ber-vech-i muharrer hîn-i emirde mezbûr Mustafa Ağa’nın dahi kabûlünü müş‘ir nesne da‘vâ etmeyip mutlak medyûn-ı mezbûrun emrine binâ’en meblağ-ı mezbûru mezkûr Mustafa Ağa’dan talebi meşrû‘ olmayıp da‘vâsı lağv-ı mahz olmağla mezbûr Mustafa Ağa’ya suâl dahi teveccüh etmeyip müdde‘î-i mezbûr Hüseyin Ağa bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâdis min-Zilkâ‘deti’ş-şerîfe li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, umdetü’l-eşbâh ve’l-a‘yân Mehmed Ağa ser-çavuşân.