İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 409 Hüküm no: 307 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa b. İbrahim b. Abdullah’ın Ahmed Ağa’daki alacağına Ahmed Efendizâde Telhisî Mehmed Ağa ile İbrahim Ağa b. Ahmed’in kefil olmaları üzerine mezkur borcun taksitle ödenmesine razı olduğu Medîne-i Kayseriye tevâbi‘inden Çarlak nâm karyede sâkin Mahmud Ağa b. İbrahim b. Abdullah nâm kimesne tarafından husûs-ı âti’l-beyâna vekîl-i müsecceli olan es-Seyyid Ahmed Çelebi b. es-Seyyid Receb meclis-i şer‘-i şerîf-i enverde erbâb-ı tımardan Ahmed Ağa b. Osman mahzarında ikrâr-ı tâm ve takrîr-i kelâm edip müvekkilim mezbûr Mahmud Ağa’nın yedinde olan hüküm hücceti mûcebince mezbûr Ahmed Ağa zimmetinde cihet-i deyn-i şer‘îden altı yüz elli guruş hakkı olmağla mezbûr Ahmed Ağa târih-i kitâbdan beş ay mukaddem meblağ-ı mezbûr içün habs etdirmiş idi lâkin mezbûr Ahmed Ağa’nın meblağ-ı mezbûru icâleten edâya iktidârı olmamağla tecîle tâlib olmağın ben dahi bi’l-vekâle meblağ-ı mezbûr altı yüz elli guruşu müvekkilim mezbûra târih-i kitâbdan altı ay tamamına değin bi’t-tamam edâ ve teslîm etmek üzere tecîl etdiğimde ol dahi ber-vech-i muharrer tecîl-i mezbûru kabûl ve meblağ-ı mezbûr altı yüz elli guruşu ber-vech-i muharrer edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î Ahmed Efendizâde Telhîsî Mehmed Ağa ve Diyârbekirli fahrü’l-eşbâh İbrahim Ağa b. Ahmed meclis-i şer‘de mezbûr Ahmed Ağa’nın nefsine ve gaybet ederse meclis-i şer‘a ihzârına kefâlet-i sahîha ile kefîlleri olmağın mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: Eş-Şeyh Âşûr Efendi b. Abdurrahman, fahrü’l-eşbâh Ganizâde Efendi, Hüseyin Çelebi b. Ahmed, Mehmed Efendi b. Mustafa, Mehmed Efendi b. Ahmed, İbrahim Çelebi b. Ahmed.