İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 409 Hüküm no: 308 Orijinal metin no: [97b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen David v. Artin’in mirasının varisleri arasında taksimi Husûs-ı âti’z-zikrin mahâllinde ketb ve tahrîri bâbında fermân-ı âlî vârid olmağın imtisâlen lehû savb-ı şer‘-i enverden keşif nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mâr lardan Ali Halîfe b. Abdullah ve diğer Ali Halîfe b. Abdülmennan ile mahmiye-i İstanbul’da Kâtib Kasım mahallesinde vâki‘ bir tarafdan Alacacı Avanos zimmî mülkü ve bir tarafdan ba‘zen Gül nâm nasrâniye ve ba‘zen İsrail mülkleri ve iki tarafdan tarîk-i âm ile mahdûd menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz kimesneler mahzarlarında akd-i meclis-i şer‘-i şerîf eylediğinde menzil-i mezbûr yedinde mülkü ve hakkı iken bundan akdem hâlik olan David v. Artin nâm zimmînin vârisi sulbiye kebîre kızları Nazlı ve Turfende nâm nasrâniyelere münhasıra olduğu şer‘an zâhir ve mütehakkık olduktan sonra mezbûre Nazlı meclis-i ma‘kūd-ı mezbûrda kız karındaşı mezbûre Turfende muvâcehesinde takrîr-i kelâm ve bast-ı merâm edip mezbûre Turfende ile beynimizde iştirâki’s-seviy üzere mülk-i mevrûsumuz olan bir tarafdan Mustafa Ağa mülkü ve bir tarafdan Meleksîmâ ve ba‘zen Avanos ve ba‘zen Bogos nâm zimmîler mülkleri ve bir tarafdan Ali Beşe menzili ve bir tarafdan tarîk-i âm ile mahdûd ve bi’r-i mâyı muhtevî cüneynenin her biri taksîm kabûl etmeleriyle her biri alâ haddetin beynimizde taksim olunmak matlūbumuzdur dedikde gıbbe’t-tasdîkı’ş-şer‘î mi‘mâr ân-ı mezbûran evvelâ menzil-i mezbûru bi’l-muvâcehe misâha eylediklerinde tûlen ve arzen bi-hesâbı terbî‘î iki yüz yetmiş iki zirâ‘ binâ ma‘a’l-arsa ve otuz dört zirâ‘ arsa-i hâliyeden mezbûretânın her birine yüz otuz altı zirâ‘ binâ ma‘a’l-arsa ve on yedişer zirâ‘ arsa-i hâliye isâbet eylediği zâhir ve nümâyân olmağın iki tarafdan sokak köşesinde vâki‘ fevkānî bir kebîr oda ve bir matbah ve bir kilâr ve bir tahta-pûş ve bir dehliz ve vüstâda bir kebîr oda ve bir kilâr ve tahtânî bir oda ve bir nısf oda ve sokak kapısına müştemil yüz otuz altı zirâ‘ binâ ma‘a’l-arsa ve on yedi zirâ‘ arsa-i hâliye mezbûre Nazlı’ya hisse ta‘yîn ve tahsîs olunup ve mezbûr Alacacı Avanos cânibinde vâki‘ fevkānîde bir kebîr oda ve bir matbah ve bir kilâr ve dehliz ve tahta-pûş ve vüstâda bir oda ve dehliz ve tahtânî bir oda ve bir nısf oda ve bir zîr-i zemîn ve bir bi’r-i mâ ve bir kenîfi müştemil yüz otuz altı zirâ‘ binâ ma‘a’l-arsa ve on yedi zirâ‘ arsa-i hâliye mezbûre Turfende’ya bir hisse ta‘yîn ve tahsîs olunup ve sâniyen cüneyne-i mezbûre üzerine varıp kezâlik mi‘mârân-ı mezbûrân bi’l-muvâcehe misâha eylediklerinde bi-hesâbı mezbûr üç yüz otuz zirâ‘ cüneyneden her birinin nısf hissesine yüz altmış beşer zirâ‘ cüneyne isâbet etmekle ba‘zen sokak ve Mustafa Ağa ve Meleksîmâ ve Ali Beşe taraflarında vâki‘ yüz altmış beş zirâ‘ cüneyne mezbûre Nazlı’ya hisse ta‘yîn ve tahsîs olunup ve yine ba‘zen sokak ve Avanos ve Bogos taraflarında vâki‘ ve bi’r-i mâyı muhtevî kezâlik yüz altmış beş zirâ‘ cüneyne mezbûre Turfende’ya hisse ta‘yîn olundukda her biri bi’t-terâzî kabz ve kabûl eyleyip ve menzil-i mezbûrdan mezbûre Nazlı’ya hisse ta‘yîn olunan ebniye min-haysü’l-kıyme eşref olmağla kendüden mezbûre Turfende’ya [edâsı] lâzım gelen kırk guruşun yirmi guruşunu hadîka-i mezbûreden mezbûre Turfende’ya hisse ta‘yîn olunan mevzi‘in kezâlik min-haysü’l-kıyme izdiyâdı olup kendüye lâzım gelen yirmi guruşa takās ve bakī yirmi guruşu dahi mezbûre Turfende’ya teslîm etmek üzere mezbûre Turfende dahi mukāssa ve kabûl etdiğinden sonra her biri âhara hisse ta‘yîn olunan ebniye ve arsa ve cüneyneye müte‘allika âmme-i da‘vâdan her biri âharın zimmetini ibrâ ve ıskāt etmeğin vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Mehmed Çelebi b. İbrahim ve Hasan b. Abdurrahman ile meclis-i şer‘a gelip alâ vukû‘ihî inhâ ve takrîr etmeğin mâ hüve’l-vâki‘ bi’t-taleb ketb ü tahrîr olundu. Fi’l-yevmi’s-sâbi‘ ve’l-ışrîn min-Şa‘bâni’l-mu‘azzam sene [1]107 Şuhûdü’l-hâl: Ali Efendi b. İbrahim el-imâm, İbrahim Efendi b. Mehmed el-müezzin, Osman Ağa b. ( ), Ahmed Çelebi b. Abdullah, Osman Çelebi b. Nasuh, Ali Beşe b. Mustafa, İbrahim Beşe b. Abdullah.