İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 411 Hüküm no: 309 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatip Ahmed Efendi’nin sâbık Diyarbekir Kādısı Mehmed Emin Efendi b. Mehmed’e para ve altın verip alamadığı yolundaki iddiasını ispatlayamadığı Fi’l-asl medîne-i Diyârbekir’da Şeyh Matar mahallesi ahâlîsinden olup hâlâ mahmiye-i İstanbul’da Sultan Mehmed Han Câmi‘-i şerîfi kurbünde bi-tarîkı’l-müsâfere sâkin Hatib Ahmed Efendi b. Mehmed meclis-i şer‘-i şerîf-i enverde sâbıkā Diyârbekir kādısı olan işbu râfi‘ü’l-kitâb umdetü’l-mevâli’l-izâm Mehmed Emin Efendi b. Mehmed mahzarında üzerine da‘vâ ve takrîr-i kelâm edip mûmâ-ileyh Mehmed Emin Efendi Diyârbekir kadısı iken hitâbet beratımı tescîl ve hitâbeti bana zabtetdirmek içün bi gayr-ı hakkın yirmi guruş ile on iki yaldız altunumu ahz u kabz ve kendi mesârifine sarfla istihlâk etmiştir hâlâ suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbıka beyyine taleb olundukda ityân-ı beyyineden izhâr-ı aczile istihlâf etmeğin fi’l-hakīka müdde‘î-i mezbûr Ahmed Efendi yedinden husûs-ı mezbûr içün bi gayr-ı hakkın yirmi guruş ile on iki yaldız altunu ahz u kabz etmeyip ol vechile meblağ-ı mezbûr yirmi guruşu ve on iki yaldız altununun müdde‘î-i mezbûra edâsı üzerine lâzım gelmediğine mûmâ-ileyh Mehmed Emin Efendi’ye yemîn teklîf olundukda ol dahi hasbe’l-mesûl yemîn billâhi te‘âlâ etmeğin mûcebiyle müdde‘î-i merkūm Hatib Ahmed Efendi bilâ-beyyine bî vech mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’l-hâmis min-şehr-i Ramazani’l-mübârek li-sene seb‘a ve mie ve elf. Şuhûdü’l-hâl: İbrahim Çelebi b. Ahmed, Mehmed Efendi b. Hüseyin, Diğer Mehmed Efendi b. Hüseyin, Mehmed Çelebi b. İbrahim, Ali Beşe çukadâr.