İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 411 Hüküm no: 310 Orijinal metin no: [98a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahbaz Hatun Vakfı’na ait hamamın Fâtıma Hatun bt. x/Abdullah tarafından kiralandığı Mahmiye-i İstanbul’da el-Hâc Hüseyin mahallesinde vâki‘ merhûm Şehbaz Hatun Vakfı’na mütevellî olan Abdullah Efendi b. Ahmed nâm kimesne meclis-i şer‘-i şerîf-i enverde mahalle-i mezbûre sâkinelerinden olup zâtını ma‘rifet-i şer‘iyye ile ârifân Salih Efendi b. Receb ve İmâm Rasûl Efendi b. Ahmed ta‘rîfleriyle mu‘arrefe olan işbu râfi‘atü’l-kitâb Fâtıma Hatun bt. Abdullah mahzarında bi’t-tevliye ikrâr ve takrîr-i kelâm edip mezbûre Fâtıma Hatun’un zevci olup benden mukaddem vakf-ı mezbûra mütevellî iken fevt olan el-Hâc Mustafa b. Ahmed nâm kimesne zamân-ı tevliyetinde vakf-ı mezbûr müstagallâtından mahalle-i mezbûrede vâki‘ zuhriye hamamını taraf-ı vakıfdan istîcâr etmek üzere hilâf-ı şer‘ müddet-i ma‘lûme kendi tasarruf eyledikden sonra hâl-i hayatında maraz-ı mevtinde zevcesi mezbûre Fâtıma Hatun’a muvâza‘aten ferâğ ve tefvîz ve kendi fevt oldukda yerine ben mütevellî olmağla ferâğ-ı mezbûrun adem-i sıhhatine binâ’en hamam-ı mezbûru âhara îcâr içün merkūme Fâtıma Hatun’dan bi’t-tevliye taleb ve da‘vâ eylediğimde ol dahi kazıyye vech-i muharrer üzere olduğunu ikrâr ve i‘tirâf edip lâkin hamam-ı mezbûrun meremmet-i lâzımesine izn-i mütevellî ile vakf-ı mezbûra bi şarti’r-rücû‘ malımdan altmış yedi bin yüz elli akçe harç ve sarf etmişidim deyü meblağ-ı mezbûru taraf-ı vakıfdan taleb ve da‘vâ etmekle beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip mezbûre Fâtıma Hatun müdde‘âsı olan meblağ-ı mezkûra müte‘allika âmme-i da‘vâdan taraf-ı vakf-ı mezbûru ibrâ-i âmm-ı kātı‘u’n-nizâ‘la ibrâ ve ıskāt etmekle ben dahi hamam-ı mezbûru el-ân icâre-i misliyesi idüğü vukūf-ı tâmmı olan sikât-ı sahîhatü’l-kelimât ihbârlarıyla müte‘ayyen olan iki yüz guruş mu‘accele ve yevmî on iki akçe mü’eccele ile bi’l-izni’ş-şer‘î mezbûre Fâtıma Hatun’a taraf-ı vakf-ı mezbûrdan bi’t-tevliye îcâr ve teslîm ol dahi istîcâr ve tesellüm ve kabûl eyledi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî gurre-i Zilkâ‘deti’ş-şerîfe li-sene seb‘a ve mie ve elf. Şuhûdü’l-hâl: Mehmed Efendi halîfe-i muhâsebe, Abdurrahman Efendi halîfe-i muhâsebe, Mustafa Efendi b. Hasan, el-Hâc İsmail b. Murad, el-Hâc Salih Efendi b. Receb, İslâm Efendi b. ( ), Rasûl Efendi el-imâm, el-Hâc Mustafa b. el-Hâc Ahmed, İbrahim Çelebi b. Ahmed.