İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 412 Hüküm no: 311 Orijinal metin no: [98a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Efendi b. Mehmed b. Abdurrahman’ın ölmeden evvel ettiği vasiyet gereği terekesinin tamamına eşi ve tek varisi Belkıs Hatun’un sahip çıkmasının doğru olduğu Mahmiye-i İstanbul’da merhûm ve mağfûrun leh eş-Şeyh Ebulvefâ evkāfına hâlâ mütevellî olan el-Hâc Mehmed Ağa b. Mustafa nâm kimesne meclis-i şer‘-i şerîf-i enverde mârrü’z-zikr eş-Şeyh Ebulvefâ mahallesinde sâkine Belkıs bt. Abdullah nâm hatun tarafından husûs-ı âti’l-beyâna vekîl-i müsecceli olan Mehmed Efendi b. Mustafa mahzarında üzerine da‘vâ ve takrîr-i kelâm edip müvekkilesi mezbûre Belkıs’ın zevci olup mahalle-i mezbûrede sâkin iken bundan akdem vefât eden Mustafa Efendi b. Mehmed b. Abdurrahman’ın mezbûre Belkıs Hatun’dan gayri zâhirde vârisi olmamağla terekesinin rub‘ı bi hasebi’l-irsi’ş-şer‘î mezbûre Belkıs’a isâbet ve intikāl edip selâse-i erbâ‘ı ve taraf-ı vakf-ı mezbûra âid ve râci‘ olmuş iken mezbûre Belkıs Hatun müteveffâ-yı mezbûrun terekesinin mecmû‘una bi gayr-ı hakkın vâz‘-ı yed eder suâl olunup tereke-i müteveffâ-yı mezbûrdan taraf-ı vakf-ı mezbûra âid olan hisse-i ma‘lûmemi bana teslîme vekîl-i mezbûra tenbîh olunmak matlûbumdur dedikde gıbbe’s-suâl vekîl-i mezbûr cevâbında müvekkilesi mezbûrenin ber-vech-i muharrer tereke-i müteveffâ-yı mezbûra vaz‘-ı yedini ikrâr lâkin müvekkilem mezbûrenin zevci müteveffâ-yı mezbûr Mustafa Efendi hâl-i marazda fevtinden beş gün mukaddem mahalle-i mezbûrede vâki‘ sâkin olduğum menzilim dâhilinde nukūd [98b] ve urûz ve esâs-ı beyt ve evanî-i nuhâsiye ve gayr-ı nühâsiye ve bi’l-cümle ism-i mâl ıtlâk olunur eşyânın cümlesin müvekkilem mezbûre Belkıs nefsi’çün ahz u kabz ve keyfe mâ teşâ mutasarrife olsun deyü mahzar-ı Müslimînde vasiyyet edip musırrân alâ îsâ’ihî fevt olmağla vaz‘-ı yed eder deyücek gıbbe’l-istintâk ve’l-inkâr ber-vech-i muharrer vasiyyet-i mezbûre şer‘an câiz olmağla vekîl-i mezbûrdan ber-vech-i muharrer müdde‘âsını mübeyyene beyyine taleb olundukda udûl-i Müslimînden olup mahalle-i mezbûre sükkânından el-Hâc Mehmed Çelebi b. Receb ve Müezzin Mustafa Efendi b. Ömer nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Mustafa Efendi b. Mehmed b. Abdurrahman hâl-i marazında mevtinden beş gün mukaddem ber-vech-i muharrer mahalle-i mezbûrda vâki‘ sâkin olduğum menzilim dâhilinde nukūd ve urûz ve evânî-i nühâsiye ve gayr-ı nühâsiye ve bi’l-cümle ism-i mâl ıtlâk olunur eşyâyı nefsi içün ber-vech-i muharrer ahz u kabz ve keyfe mâ teşâ mutasarrife olsun deyü bizim huzûrumuzda vasiyyet edip ve musırrân alâ îsâ’ihî vefât eyledi biz bu husûsa bu vech üzere şahidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mütevellî-i mezbûr bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’s-sâlis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: İsmail Efendi b. Mustafa, Mehmed Efendi b. Ahmed, Mustafa Efendi b. Ahmed, Ahmed Efendi b. Şaban, el-Hâc Mehmed Çelebi b. Halil, Ahmed Çelebi b. Mehmed, Mehmed Ağa b. Ahmed Ağa, Hüseyin Çelebi b. Mustafa, Musa Efendi b. Mehmed, el-Hâc Mehmed b. Ali, Hammâmîzâde Abdullah b. Mustafa, İbrahim Çelebi b. Ahmed.