İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 414 Hüküm no: 312 Orijinal metin no: [98b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çelebi Kethuda lakabıyla tanınan Mehmed Ağa’nın, Mehmed Ağa b. Yusuf’tan haksız yere aldığı yüz kuruşu ödemesinin gerekli olduğu Sâbıkā Dergâh-ı âlî yeniçerilerinin altıncı sekbânlarına mahsûs oda ahâlîsinin çorbacıları olan Mehmed Ağa b. Yusuf meclis-i şer‘-i şerîf-i enverde sâbıkā kul kethudâsı olan Çelebi Kethudâ demekle şehîr Mehmed Ağa’nın kethudâsı Hüseyin Ağa b. Mustafa mahzarında üzerine da‘vâ ve takrîr-i kelâm edip mûmâ-ileyh Mehmed Ağa ber-vech-i muharrer kul kethudâsı iken ben altıncı sekbânların çorbacısı olduğumda mezbûr Hüseyin Ağa bi-gayr-ı hakkın yüz guruşumu ahz u kabz ve kendi mesârifine sarfla istihlâk etmiştir hâlâ suâl olunup alıverilmesi matlûbumdur dedikde gıbbe’s-suâl mezbûr Hüseyin Ağa cevâbında zikrolunan çorbacılığın kul kethudâlarına yüz guruş câizesi olmağla müdde‘î-i mezbûr Mehmed Ağa müdde‘âsı olan meblağ-ı merkūm yüz guruşu mûmâ-ileyh Çelebi Kethudâ beye def‘ u teslîm etmek içün bi tarîkı’l-emâne bana def‘ u teslîm ben dahi emâneten ahz u kabz ve müdde‘î-i mezbûrun emrine binâ’en mûmâ-ileyh kethudâ bey Mehmed Ağa’ya def‘ u teslîm edip ol vechile meblağ-ı mezbûr mutâlebesinden zimmetim berî olmuşdur deyü da‘vâyı def‘ edicek gıbbe’l-istintâk ve’l-inkâr mezbûr Hüseyin Ağa’dan def‘-i mezbûruna mutâbıka beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka meblağ-ı mezbûr yüz guruşu mûmâ-ileyh Çelebi Kethudâ bey Mehmed Ağa’ya def‘ u teslîm etmek içün mezbûr Hüseyin Ağa’ya bi tarîkı’l-emâne def‘ u teslîm etmeyip ber-vech-i muharrer def‘ ve teslîme emir dahi etmeyip ol vechile meblağ-ı mezbûr mutâlebesinden mezbûr Hüseyin Ağa’nın zimmeti berî olmadığına müdde‘î-i merkūm Mehmed Ağa’ya yemîn teklîf olundukda ol dahi hasbe’l-mesûl yemîn billahi te‘âlâ etmeğin mûcebiyle meblağ-ı merkūm yüz guruş müdde‘î-i mezbûra bi tarîkı’d-damân edâ ve teslîme mezbûr Hüseyin Ağa’ya tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâlis aşar min-Zilkadeti’ş-şerîfe sene [1]107 Şuhûdü’l-hâl: İbrahim Çelebi b. Ahmed, Mehmed Çelebi b. İbrahim, Receb b. Osman, Mustafa b. Şaban, Ali b. Bali, el-Hâc Halil Efendi b. Mehmed, Mehmed Efendi b. Hüseyin, Ali Beşe b. ( ).