İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 414 Hüküm no: 313 Orijinal metin no: [98b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cariye oldukları iddia edilen Rus asıllı Gonca bt. Abdullah ile validesi Gülistan’ın hür olduklarının tespit olunduğu. Açık kaşlı gök elâ gözlü tahmînen on iki yaşında olup nefsinden ta‘bîre kādir olmamağla vech-i âtî üzere da‘vâya kıbel-i şer‘den me’zûn olan Rusiyyetü’l-asl bâ‘isetü hâze’l-kitâb Gonca bt. Abdullah meclis-i şer‘-i şerîf-i enverde rakīka olmak üzere kendüye vâzı‘u’l-yed olan Tarakçı Mehmed b. Abdullah nâm kimesne mahzarında üzerine da‘vâ ve takrîr-i kelâm edip ben mahmiye-i İstanbul’da Kocamustafapaşa-yı atîk mahallesinde sâkine iken bundan [akdem] vefât eden Ayşe bt. Abdullah b. Abdurrahman’ın câriye-i memlûkesi olmağla mezbûre Ayşe Hatun hâl-i hayatında yedinde câriye-i memlûkesi olan işbu hazır bi’l-meclis Gülistan ile beni malından tahrîr ve i‘tâk ve kayd-ı rıkkıyetten ıtlâk edip ben sâir harâir-i asliyât gibi hürre olduğumdan sonra mezbûr Ayşe fevt olup sadrî kebîr oğlu ve hasran vârisi olan Mehmed Çelebi b. Mustafa b. Receb ber-vech-i muharrer vâlidesi mezbûre Ayşe beni tahrîr ve i‘tâk edip ben [99a] sâir harâir-i asliyât gibi hürre olduğumu alâ ruûsi’l-işhâd ikrâr ve i‘tirâf dahi etmiş iken mezbûr Tarakçı Mehmed rakīka olmak üzere bana vaz‘-ı yed eder hâlâ suâl olunup kasr-ı yedine tenbîh ve sebîlim tahliye olunmak matlûbumdur dedikde gıbbe’s-suâl mezbûr Mehmed cevâbında mevsûfe-i mezbûre Ayşe’nin terekesinden kendi iştirâ etmek üzere mezbûre Ayşe’nin sadrî oğlu olup kendinden sonra fevt olan mezbûr Mehmed hâl-i hayatında yetmiş beş guruşa kezâlik rakīka olmak üzere bana bey‘ u teslîm ben dahi iştirâ ve tesellüm ve def‘-i semen-i mezbûr etmişidim deyü ber-vech-i muharrer vaz‘-ı yedini ikrâr lâkin mezbûrenin ıtkını inkâr edicek müdde‘iye-i mezbûreden müdde‘âsını mutâbıka beyyine taleb olundukda udûl-i ahrâr-ı ricâl-i Müslimînden olup mahalle-i mezbûre sükkânından Mustafa Çelebi b. Abdullah nâm kimesne ile Hâce Râbia Hatun bt. Ahmed ve Safiye bt. Yusuf ve İsmihan bt. Abdullah nâm hatunlar li ecli’ş-şehâde meclis-i şer‘a hâzırûn olup isre’l-istişhâd fi’l-hakīka müteveffât-ı mezbûre Ayşe bt. Abdullah b. Abdurrahman’ın sadrî kebîr oğlu olup kendinden sonra fevt olan mezbûr Mehmed Çelebi b. Mustafa b. Receb hâl-i hayatında vâlidem mezbûre Ayşe Hatun hayatında yedinde câriye-i memlûkesi olduğu hâlde işbu mezbûre Gonca’yı vâlidesi mezbûr Gülistan ile ma‘an malından tahrîr ve i‘tâk ve kayd-ı rıkkıyetden ıtlâk edip mevsûfe-i mezbûre Gonca sâir harâir-i asliyât gibi hürre olmuşdur benim alâkam ve medhalim kalmadı deyü bizim huzûrumuzda ikrâr ve i‘tirâf edip bizi işhâd etmişidi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde şuhûd-ı mezbûrun mahalleleri ahâlîsinden sırren ve alenen ta‘dîl ve tezkiye olmağın mûcebiyle ba‘de’l-hükm ve’t-tenbîh mâ vaka‘a bi’t-taleb ketb olundu. Fi’l-yevmi’l-âşir min-Zilkadeti’ş-şerîfe sene [1]107 Şuhûdü’l-hâl: Mehmed Çelebi b. İbrahim, Murtaza Efendi b. ( ), Çavuş Mehmed el-muhzır, Ali Beşe çukadâr, Abdurrahman b. Abdullah.