İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 416 Hüküm no: 314 Orijinal metin no: [99a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Kapudan b. Ali b. Abdurrahman’ın Pabuççu Süleyman’ın isteğine uyarak Mehmed b. Ebubekir için harcadığı parayı mezbur Mehmed’den taleb etmesinin meşru olmadığı Trablus-ı mağrib kapudanlarından Halil Kapudan b. el-Hâc Ali b. Abdurrahman tarafından husûs-ı âti’z-zikre vekîl olduğu yedinde olan hüccet-i şer‘iyye nâtıka olduğu üzere şer‘an sâbit olan Süleyman b. Mehmed dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde Mehmed b. Ebûbekir nâm şâb-ı emred mahzarında üzerine da‘vâ ve takrîr-i kelâm edip gāib ani’l-meclis kaynım Pabuçcu Süleyman bundan akdem mezbûr Mehmed’i hâl-i suğrunda mahmiye-i İstanbul’da bir tarîk ile ihlâl ve ahz ve cebren sefîne ile Trablus-ı mağrib’e götürüp korsan sefînesiyle deryâda gezerken harbî kefere mezbûr Süleyman ile mezbûr Mehmed’i ahz ve esir eyledikten sonra harbî kefereden Trablus sefînelerinde esir olan üç yüz nefer üserâyı sefîne kapudanları harbî kefereye teslîm onlar dahi mukābelesinde mezbûrân ile üç yüz nefer Müslim esirleri meccânen tahlîs ve sefînelerinden dâr-ı İslâma ihrâc etmişler idi lâkin müvekkilim mezbûr Halil Kapudan esnâ-i halâsda mezbûr Süleyman’ın emriyle mezbûr Mehmed içün kendi malından iki yüz yedi buçuk guruş harç ve sarf eyledikden sonra mezbûr Süleyman meblağ-ı mezbûru edâ etmeyip gaybet etmekle meblağ-ı mezbûr iki yüz yedi buçuk guruşu merkūm Mehmed’den bi’l-vekâle taleb ederim suâl olunsun dedikde müdde‘î-i mezbûrun takrîr-i meşrûhu üzere meblağ-ı mezbûru merkūm Mehmed’den talebi meşrû‘ olmayıp da‘vâsı lağv-ı mahz olmağla mezbûr Mehmed’e suâl dahi teveccüh etmeyip müdde‘î-i mezbûr Süleyman bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâlis aşar min-Zilkadeti’ş-şerîfe sene [1]107 Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, umdetü’l-eşbâh ve’l-a‘yân Mehmed Ağa ser-çavuşân, fahrü’l-akrân Mehmed Ağa-yı muhzır, Mehmed Çavuş b. ( ), İbrahim Çavuş b. ( ).