İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 416 Hüküm no: 315 Orijinal metin no: [99b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vidin ahalisinden Ruzcese bt. Vişo’nun hür olduğunu isbat ettiği Ber-vech-i âtî üzere kıbel-i şer‘den me’zûn olan ( ) açık kaşlı elâ gözlü orta boylu bâ‘isü hâze’l-kitâb Ruzcese bt. Vişo dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde rakīka olmak üzere kendüye vâzı‘u’l-yed olan Hüseyin Ağa b. Abdullah nâm kimesne mahzarında üzerine da‘vâ ve takrîr-i kelâm edip ben vilâyet-i Rumeli’nde nefs-i kasaba-i Vidin ahâlîsinden olup hürrü’l-asl olan Vişo nâm nasrânînin firâşından hâsıla ve zevce-i menkûhası Angelina nâm nasrâniyeden mütevellide sulbiye kızı olup hâlâ kasaba-i mezbûrede sâkin meyhâneci Ostoyani v. Kosto nâm nasranînin zevce-i menkûhası olduğum hâlde işbu Ostoniye nâm sagīre benden tevellüd etmeğin bana ve işbu sagīr-i mezbûreye ve ebeveynime kat‘â rıkk târî olmamış hürretü’l-asl olup mukaddemâ Arnavud eşkıyâsı kasaba-i mezbûreyi basıp beni ahz ve Ruscuk iskelesine götürüp rakīka olmak üzere beni bi-gayr-ı hakkın âhara bey‘ etmişler idi hâlâ merkūm Hüseyin Ağa ber-vech-i muharrer rakīka olmak üzere bana bi-gayr-ı hakkın vaz‘-ı yed eder suâl olunup sebîlim tahliye ve mezbûrun kasr-ı yedine tenbîh olunmak matlûbumdur dedikde gıbbe’s-suâl mezbûr Hüseyin Ağa cevâbında mevsûfe-i mezbûreyi Ruscuk iskelesinde rakīka olmak üzere Sefer Beşe nâm kimesneden yüz otuz iki guruş semen-i medfû‘a iştirâ ve tesellüm etmişidim deyü ber-vech-i muharrer vaz‘-ı yedini ikrâr lâkin müdde‘iye-i mezbûrenin hürriyetini inkâr edicek müdde‘iye-i mezbûreden müdde‘âsına mutâbıka beyyine taleb olundukda udûl-i Müslimînden ve Dergâh-ı âlî yeniçerilerinin on altıncı cemâ‘atine mahsûs oda ahâlîsinden olmağla bundan akdem Vidin kal‘ası muhâfazasında olup hâlâ mahmiye-i İstanbul’da oda-i mezbûrede sâkinler olan Ahmed Odabaşı b. Ömer ve Bayrakdâr Ali Beşe b. İsmail ve kasaba-i mezbûreden Nişli Mustafa Beşe b. Abdullah nâm kimesneler li-ecli’ş-şehâde meclis-i mezbûra hâzırûn olup isre’l-istişhâd fi’l-hakīka işbu mevsûfe-i mezbûre Ruzcese kasaba-i Vidin ahâlîsinden olup hürrü’l-asl olan Vişo nâm nasrânînin firâşından hâsıla ve zevcesi olup hürretü’l-asl olan merkūme Angelina’dan mütevellide sulbiye kızı olup hâlâ kasaba-i mezbûrede sâkin Meyhâneci merkūm Ostayani v. Kosta’nın zevce-i menkûhası olduğu hâlde işbu Ostoniye nâm sagīre dahi mezbûreden tevellüd etmeğin kendüye ve işbu sagīre-i mezbûreye ve ebeveynine kat‘â rıkk târî olmamak üzere hürrü’l-asldır biz bu husûsa bu vech üzere mezbûre Ruzcese’nin hürriyetine şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle mevsûfe-i mezbûrenin hürriyetine ba‘de’l-hükm mevsûfe-i mezbûreden mezbûr Hüseyin Ağa’nın kasr-ı yedine tenbîh ve mezbûrenin sebîli tahliye olunmağın mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ışrîn min-Zilkâ‘deti’ş-şerîfe sene [1]107 Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, umdetü’l-eşbâh ve’l-a‘yân Mehmed Ağa ser-çavuşân, fahrü’l-akrân ve’l-ekfâ muhzırbaşı Mehmed Ağa, Mehmed Çavuş b. ( ), Mehmed Efendi b. Hüseyin, el-Hâc Halil Efendi b. Mehmed, Ali Beşe b. Sinan, es-Seyyid Halil Efendi b. el-Hâc Receb, Halil Beşe b. Himmet Kethudâ, Ali Beşe b. el-Hâc Hüseyin.