İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 418 Hüküm no: 316 Orijinal metin no: [99b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Ali’nin sonradan yaptırdığı pencerelerin komşusu Sunullah b. Turgut’un menziline verdiği zararı önleyeceğine dair söz verdiği Husûs-ı âti’z-zikrin mahâllinde ketb ve tahrîri içün fermân-ı âlî sâdır olmağın imtisâlen lehû savb-ı şer‘-i mutahharadan fahrü’l-müderrisîni’l-kirâm keşif nâibimiz olan Abdullah Efendi b. Ali irsâl olunup ol dahi hâssa mi‘mârlardan Ali Halîfe b. Abdurrahman ve Mustafa Halîfe b. Abdülmennan ile mahmiye-i İstanbul’da Karabaş mahallesi sâkinlerinden İsmail b. Ali nâm kimesnenin menziline varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i mübîn eylediğinde mezbûr İsmail meclis-i ma‘kūd-ı mezbûrda câr-ı mülâsıkı işbu dâhilü’l-kitâb el-Hâc Sunullah b. Turgut nâm kimesne muvâcehesinde ikrâr ve takrîr-i kelâm edip mezbûr el-Hâc Sunullah bana işbu menzilin fevkānîde üç aded ve tahtânîde iki aded pencerelerin muhdes ve benim menzilimin makarr-ı nisvân olan mevâzi‘ine havâlesi olmağla men‘ u def‘ eyle deyü benden da‘vâ etmeğin ben dahi fevkānîde vâki‘ sâlifü’z-zikr üç aded pencerenin ikisini dolma duvar ile sedd ve birine kaba baklama sanduk perde ve tahtânîde olan iki aded pencerelerin dahi her birine ikişer kat havâle camı ta‘bîr olunur cam vaz‘ı ile havâle-i mezbûreyi men‘ u def‘a ta‘ahhüd eyledim dedikde gıbbe’t-tasdîkı’ş-şer‘î mevlânâ-yı mezbûr mahâllinde ketb ve tahrîr ve ma‘an irsâl olunan Mehmed Çelebi b. İbrahim ve Yusuf b. Abdullah ile meclis-i şer‘a gelip alâ vukû‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: Ramazan Efendi b. Ahmed el-imâm, Mehmed Çelebi b. Mustafa el-müezzin, Hüseyin Beşe b. Mahmud, İsmail Çelebi b. Sefer, el-Hâc Ahmed b. Mehmed.