İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 418 Hüküm no: 317 Orijinal metin no: [100a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maden b. Cafer’den boşanan Sâliha Hatun bt. Abdullah’ın kocasından alacağı olduğu yolundaki iddiasını ispatlayamadığı Mahmiye-i İstanbul’da Küçükayasofya kurbünde Hüseyin Ağa mahallesi sâkinelerinden Sâliha Hatun bt. Abdullah ba‘de’t-ta‘rîfi’ş-şer‘î dîvân-ı kāimmakām-ı hazret-i sadrazamîde meclis-i ma‘kūd-ı şer‘-i şerîf-i enverde zevc-i mutallakı işbu râfi‘ü’l-kitâb Maden b. el-Hâc Cafer nâm kimesne mahzarında üzerine da‘vâ ve takrîr-i kelâm edip mezbûr Maden mukaddemâ kırk guruş mehr-i mü’eccel tesmiyesiyle lede’ş-şuhûd tezvîc ve kabûl ve bana duhûl eyledikden sonra târih-i kitâbdan üç sene mukaddem beni tatlik edip mehr-i mezkûrun iki buçuk guruşunu yedinden ahz u kabz edip otuz yedi buçuk guruş hakkım bâkī kalmıştır hâlâ suâl olunup alıverilmesi matlûbumdur dedikde gıbbe’s-suâl mezbûr Maden cevâbında müdde‘iye-i mezbûreyi ancak iki buçuk guruş mehr-i mü’eccel ile tezvîc ve kabûl ve ba‘de’t-tatlîk kabzına mutasarrıf olduğu vech üzere kendüye edâ ve teslîm etmişidim deyü ziyâde-i mezkûreyi inkâr edicek müdde‘iye-i mezbûreden müdde‘âsına beyyine taleb olundukda ityân-ı beyyineden izhâr-ı acziyle istihlâf etmeğin fi’l-hakīka müdde‘iye-i mezbûre Sâliha’yı hîn-i tezvîcinde kırk guruş mehir ile tezevvüc etmeyip ol vechile ziyâde-i mezbûrenin müdde‘iye-i merkūmeye edâsı lâzım olmadığına mezbûr Maden’e yemîn teklîf olundukda ol dahi hasbe’l-mesûl yemîn billahi te‘âlâ etmeğin mûcebiyle müdde‘iye-i mezbûre Sâliha bilâ-beyyine bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’l-hâmis aşar min-Zilkâ‘deti’ş-şerîfe li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâb tezkire-i sânî Hâfız Efendi, fahrü’l-akrân Mehmed Ağa ser-çavuşân, umdetü’l-akrân Muhzır Mehmed Ağa, Ali Beşe b. ( ).