İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 419 Hüküm no: 318 Orijinal metin no: [100a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halep Muhassılı Ali Ağa b. Abdurrahman’ın İzmir’de bulunan emlak, arazi ve gelir getiren değirmen ve mahzen gibi işletmelerini karısı Emine Hanım’a sattığı Husûs-ı âti’z-zikrin mahâllinde ketb ve tahrîri iltimâs olunmağın savb-ı şer‘den irsâl olunan fahrü’l-müderrisîn İbrahim Efendi b. Mehmed el-Hamîdî irsâl olunup mahmiye-i İstanbul’da Zeyrek mahallesinde vâki‘ umdetü’l-emâcid ve’l-ekârim câmi‘ü’l-mehâmid ve’l-mekârim Haleb Muhassılı olan Ali Ağa b. Abdurrahman’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî eyledikde mûmâ-ileyh Ali Ağa meclis-i ma‘kūd-ı mezbûrda zevce-i menkûhası fahrü’l-muhaddarât Emine Hanım bt. el-merhûm Mehmed Paşa tarafından husûs-ı âti’l-beyâna vekîl-i şer‘îsi olan sâbıkā İzmir gümrükçüsü olan Ali Ağa b. Ahmed mahzarında ikrâr-ı tâm ve takrîr-i kelâm edip akd-i âtî sudûruna değin silk-i mülkümde münselik olup medîne-i İzmir’de Câmi‘-i atîk mahallesinde vâki‘ iki tarafdan tarîk-i âm ve bir tarafdan Yenişehirli Yusuf Bey mülkü ve bir tarafdan makābir-i Müslimîn ile mahdûd büyût-ı adîdeyi müştemil menzilimi ve yine yedimde mülk ve hakkım olup zikrolunan Câmi‘-i atîk mahallesinde vâki‘ lede’l-ahâlî ve’l-cîrân ma‘lûmü’l-hudûd ve Yahûdî hâne ve on bâb kantarcı ve şerbetçi ve fesci dükkânlarımı ve yine medîne-i mezbûre muzâfâtından Balçık ve Kızılca ve Kirizman ve Aya Sağīd nâm karyelerde ve hendek ta‘bîr olunur mevzi‘de lede’l-ahâlî ve’l-cîrân ma‘lûmü’l-hudûd ve’l-kıt‘a taht-ı tasarrufumda olan tarlalarda vâki‘ cem‘an iki bin altı yüz elli iki dip zeytin eşcârlarımı ve yine karye-i Kızılca’da vâki‘ lede’l-ahâlî ve’l-cîrân ma‘lûmü’l-hudûd bir buçuk mülk göz zeyt yağı değirmenimi ve yine Varoş nâm mevzi‘de vâki‘ bir bâb mülk zeyt yağı değirmenimi cemî‘-i tevâbi‘ ve levâhıklarıyla tarafeynden îcâb ve kabûlü hâvî bey‘-i kat‘î ile bi safkatin vâhidetin on bin guruşa zevcem mezbûre Emine Hanım’a bey‘ ve temlîk ve yine medîne-i mezbûrede zikrolunan Câmi‘-i atîk mahallesinde vâki‘ merhûm Kaplan Kapudan Mustafa Paşa evkāfından icâre-i mu‘accele ve her biri yevmî ikişer akçe mü’eccele ile taht-ı tasarrufumda olan lede’l-ahâlî ve’l-cîrân ma‘lûmü’l-hudûd yirmi bâb yemiş mahzenlerimi ve zikrolunan arâziyi dahi bâ-izn-i mütevellî ve sahib-i arz iki bin beş yüz guruş bedel mukābelesinde mezbûre Emine Hanım’a ferâğ ve tefvîz ol dahi vech-i meşrûh üzere iştirâ ve temellük ve tefevvüz ve kabûl ve her birlerini mahallelerine kabza taslît etdiğimden sonra semenleri olan meblağ-ı mezbûr on bin guruş ile bedel-i ferâğ olan iki bin beş yüz guruş ki cem‘an on iki bin beş yüz guruş mutâlebesinden zevcem mezbûre Emine Hanım’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm eşyâ-i muharrere-i mezkûrede kat‘an alâkam kalmayıp zevcem mezbûre Emine Hanım’ın mülk-i müşterâsı ve hakk-ı müfevvezi olmuşdur keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ma‘an irsâl olunan Mehmed b. Mehmed ve Mustafa b. Şaban ile meclis-i şer‘a gelip alâ vukū‘ıhî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-ışrîn min-Zilkadeti’ş-şerîfe li-sene seb‘a ve mie ve elf. Şuhûdü’l-hâl: Umdetü’l-eşbâh ve’l-ekfâ İbrahim Ağa b. Mahmud, Küçük Emir demekle şehîr es-Seyyid Ahmed Çelebi, fahrü’l-eşbâh es-Seyyid Ali Efendi b. Mustafa, diğer İbrahim Ağa b. Muslu, fahrü’l-eşbâh Hazînedâr Ali Ağa, Ömer Çelebi b. Ebûbekir tâbi‘-i mûmâ-ileyh, Hüseyin Beşe b. Mehmed tâbi‘-i mûmâ-ileyh, Mehmed Ağa b. Ali, Ali b. Bali.